سویڈن کے ہاتھوں عبرتناک شکست، تیونس کو غلطیاں سدھارنا ہوں گی، صابری لاموچی

سویڈن کے ہاتھوں عبرتناک شکست کے بعد تیونس کے ہیڈ کوچ صابری لاموچی کا کہنا ہے کہ اتوار کو ہونے والے میچ میں 5-1 کی عبرتناک ہار ٹیم کی فاش غلطیوں کا نتیجہ تھی اور انہوں نے خبردار کیا کہ ایسی غلطیاں ورلڈ کپ میں ان کی بقا کے لیے مہلک ثابت ہو سکتی ہیں۔

میچ کے بعد پریس کانفرنس کرتے ہوئے صابری لاموچکی نے کہا کہ یہ ایک مشکل اور انتہائی دردناک شکست ہے۔ اتنے بڑے نقصان کے ساتھ ٹورنامنٹ کا آغاز کرنا واقعی بہت مشکل ہے۔

لاموچکی نے اعتراف کیا کہ تیونس کی ٹیم سویڈن کے فارورڈز کے خطرے سے واقف تھی لیکن وہ اس سے نمٹنے میں ناکام رہی۔ ان کا کہنا تھا سویڈن کے پاس جس پائے کے دو ورلڈ کلاس فارورڈز موجود ہیں ان کے خلاف غلطیاں کرنے کے بعد آپ میچ میں واپس نہیں آسکتے۔ انہوں نے اس بھاری شکست کی سب سے بڑی وجہ بار بار دہرائی جانے والی انفرادی غلطیوں کو قرار دیا۔

انہوں نے مزید کہا کہ ہم نے حد سے زیادہ غلطیاں کیں۔لاموچکی کے مطابق دوسرے ہاف کے بعد تیونس کے کھیل میں بہتری کے کچھ آثار نظر آئے تھے لیکن مزید حماقتوں نے میچ میں واپسی کی امیدوں پر پانی پھیر دیا۔

تیونس کو گروپ ایف کے اگلے میچوں میں اب جاپان اور نیدرلینڈز کا سامنا کرنا ہے، جس پر لاموچکی کا کہنا تھا کہ اب ٹیم کے پاس جم کر جواب دینے کے سوا کوئی چارہ نہیں ہے۔ انہوں نے عزم ظاہر کرتے ہوئے کہا کہ ہمیں اپنی غیرت کی خاطر اب میدان میں ردعمل دکھانا ہوگا اور ٹیم کا ایک بہتر امیج پیش کرنا ہوگا۔