ڈالر کے مقابلے میں روپے کی پیش قدمی جاری

انٹربینک مارکیٹ میں جمعہ کو بھی ڈالر کے مقابلے روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 278.32 روپے پر بند ہوا۔

یاد رہے کہ جمعرات کو مقامی کرنسی 278.35 روپے پر بند ہوئی تھی۔

دریں اثنا جمعہ کو ابتدائی ٹریڈنگ کے دوران امریکی ڈالر نے کچھ استحکام حاصل کیا کیونکہ اس سے قبل وہ ایک ہفتے کی کم ترین سطح پر آ گیا تھا جس کی وجہ وہ اطلاعات تھیں جن کے مطابق مشرقِ وسطیٰ میں جنگ بندی کا معاہدہ قریب ہو سکتا ہے۔

جاپانی ین کے مقابلے میں امریکی کرنسی 0.1 فیصد اضافے کے ساتھ 160.07 ین پر ٹریڈ کررہی ہے۔

آسٹریلوی ڈالر 0.1 فیصد کمی کے ساتھ 0.7045 ڈالر پر رہا جبکہ اس کے مقابلے میں کیوی (نیوزی لینڈ) ڈالر بھی 0.1 فیصد گر کر 0.5830 ڈالر پر آ گیا۔

یورو کی آخری قدر 1.1576 ڈالر رہی جو کہ جمعرات کو تین سال میں پہلی بار یورپی سینٹرل بینک کی جانب سے شرح سود میں اضافے کے بعد ایک ہفتے کی بلند ترین سطح کے قریب برقرار ہے۔

برطانوی پاؤنڈ 1.3414 ڈالر پر مستحکم رہا۔

مزید برآں جمعہ کو تیل کی قیمتوں میں کمی دیکھی گئی جس کے ساتھ ہی پچھلے سیشن سے جاری مندی کا تسلسل برقرار رہا۔