سعودی عرب کی پورٹو ریکو کے خلاف 3-0 سے شاندار فتح، نئے کوچ کی زیرِ نگرانی پہلی کامیابی

سعودی عرب نے ہفتے کو ایک دوستانہ میچ میں پورٹو ریکو کے خلاف 3-0 سے کامیابی حاصل کرلی۔ شدید موسم کے باعث یہ میچ تقریباً دو گھنٹے تک معطل رہا تاہم اس فتح کے ساتھ ہی سعودی ٹیم نے نارتھ امریکہ میں ہونے والے ورلڈ کپ سے قبل اپنے نئے کوچ جارجیوس ڈونیس کی زیرِ نگرانی پہلی کامیابی سمیٹی ہے۔

میچ 21ویں منٹ میں اس وقت روک دیا گیا جب گرج چمک اور بجلی کی وجہ سے کھلاڑیوں کو میدان سے باہر جانا پڑا اور تماشائیوں کو پناہ لینے پر مجبور ہونا پڑا۔ یہ اقدام امریکی حفاظتی پروٹوکول کے مطابق کیا گیا جس کے تحت جب طوفان 8 میل کے دائرے میں موجود ہو تو کھیل کو معطل کر دیا جاتا ہے۔

بار بار بجلی چمکنے کے باعث لازمی 30 منٹ کے تعطل کے وقت کو کئی بار دوبارہ شروع کرنا پڑا جس کے بعد بالاآخر کھیل کا دوبارہ آغاز ہوسکا۔

سعودی عرب نے ہاف ٹائم سے ٹھیک پہلے اس وقت برتری حاصل کی جب سلطان مندش نے پینلٹی ایریا کے اندر حریف دفاع کی غلطی کا فائدہ اٹھایا۔ اس کے بعد، 50 ویں منٹ میں عبداللہ الحمدان نے پچ پر آگے کی پوزیشن میں گیند کا کنٹرول حاصل کیا اور آگے بڑھتے ہوئے گول کیپر کے اوپر سے ایک نپے تلے انداز میں گول داغ کر اپنی ٹیم کی برتری کو دگنا کر دیا۔

کپتان سالم الدوسری نے 88 ویں منٹ میں ایک بہترین سولو رن کے ساتھ آخری گول کیا جس سے ایکواڈور کے خلاف 2-1 سے ہونے والی شکست کے بعد سعودی عرب کو ایک حوصلہ افزا کامیابی ملی۔

سعودی ٹیم 9 جون کو سینیگال کے خلاف اپنا آخری وارم اپ میچ کھیلے گی جس کے بعد وہ گروپ ایچ میں اسپین، یوراگوئے اور کیپ ورڈی کے ساتھ اپنی ورلڈ کپ مہم کا آغاز کرے گی۔