انٹربینک مارکیٹ: ڈالر کے مقابلے روپیہ مزید بہتر

انٹربینک مارکیٹ میں جمعہ کو بھی ڈالر کے مقابلے روپے کی قدر میں اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.41 روپے پر بند ہوا۔

یاد رہے کہ جمعرات کو مقامی کرنسی 278.42 روپے پر بند ہوئی تھی۔

عالمی سطح پر خلیج میں بڑھتی ہوئی کشیدگی کے باعث سیف ہیون کے رجحان میں اضافے کی وجہ سے امریکی ڈالر ہفتہ وار بنیادوں پر مسلسل مضبوطی کی راہ پر گامزن ہے۔

امریکی صدر ڈونلڈ ٹرمپ کی مشرقِ وسطیٰ میں جنگ بندی اور تہران کے ساتھ امن قائم کرنے کی کوششوں کو نئی رکاوٹوں کا سامنا ہے کیونکہ ایران کی حمایت یافتہ حزب اللہ ملیشیا نے جمعرات کو لبنان میں ایک نئی جنگ بندی کو مسترد کردیا جبکہ اسرائیل نے کہا ہے کہ وہ ملک (لبنان) سے اپنی افواج واپس نہیں بلائے گا۔

دوسری جانب، ایشیائی مارکیٹ میں اب تک یورو 0.02 فیصد اضافے کے ساتھ 1.1612 ڈالر پر موجود ہے جبکہ برطانوی پاؤنڈ (اسٹرلنگ) 1.34228 ڈالر پر مستحکم رہا۔ دونوں ہی کرنسیاں اس وقت معمولی ہفتہ وار نقصان کی طرف بڑھ رہی ہیں۔

مارکیٹ کے اتار چڑھاؤ سے متاثر ہونے والا آسٹریلین ڈالر 0.1 فیصد کی گراوٹ کے ساتھ 0.71265 ڈالر پر آ گیا جبکہ نیوزی لینڈ کا ڈالر 2 فیصد کے ہفتہ وار اضافے کے ساتھ 0.5867 ڈالر پر برقرار رہا۔

ڈالر انڈیکس معمولی تبدیلی کے بعد 99.434 کی سطح پر دیکھا گیا اور یہ انڈیکس ہفتہ وار بنیادوں پر 0.5 فیصد اضافے کی راہ پر گامزن ہے۔