بھارتی روپیہ مستحکم، تاجروں کی نظریں تیل کی قیمتوں اور آر بی آئی اقدامات پر مرکوز

بدھ کے روز بھارتی روپیہ محدود اتار چڑھاؤ کا شکار رہا، جبکہ تاجر تیل کی قیمتوں میں اتار چڑھاؤ اور کرنسی کو سہارا دینے کے لیے اسپاٹ اور فارورڈ مارکیٹ میں ریزرو بینک آف انڈیا ( آر بی آئی) کی ممکنہ موجودگی پر نظر رکھے ہوئے تھے۔

روپیہ 95.69 فی ڈالر پر بند ہوا، جو گزشتہ سیشن کے 95.68 کے مقابلے میں معمولی تبدیلی ہے۔

تاجروں کے مطابق دن کے آغاز میں روپیہ 95.80 کی سطح سے نیچے جانے کے دباؤ میں تھا، تاہم سرکاری بینکوں کی جانب سے ڈالر فروخت نے اسے سہارا دیا۔ اسی دوران سرکاری بینکوں کو ڈالر-روپیہ سویپس کرتے بھی دیکھا گیا، جس سے فارورڈ پریمیم میں کمی آئی۔

ایک نجی بینک کے ٹریڈر کے مطابق بھارتی مرکزی بینک غالباً گزشتہ کچھ دنوں سے فارورڈ معاہدوں کی میچورٹیز کو طویل مدت (ایک سال سے زائد) میں منتقل کرنے کے لیے سویپس استعمال کر رہا ہے۔

دو سالہ ڈالر-روپیہ فارورڈ پریمیم 9 پیسے کمی کے بعد 5.83 روپے پر آ گیا۔

ادھر خام تیل کی قیمتوں میں کمی نے بھی روپے کو کچھ سہارا فراہم کیا، کیونکہ برینٹ خام تیل 3 فیصد سے زائد کمی کے ساتھ 96.5 ڈالر فی بیرل پر آ گیا، جب کہ امریکا اور ایران کے درمیان مذاکرات میں غیر یقینی صورتحال برقرار رہی۔

یہ تین ماہ پر مشتمل تنازع ایشیائی درآمدی معیشتوں پر دباؤ ڈال رہا ہے، جن میں بھارتی روپیہ، انڈونیشیائی روپیہ اور فلپائنی پیسو نمایاں طور پر کمزور کارکردگی دکھا رہے ہیں۔

گولڈمین ساکس کے مطابق بلند توانائی درآمدات، مالیاتی خدشات اور کرنٹ اکاؤنٹ خسارے کے باعث بھارت، انڈونیشیا اور فلپائن میں شرح سود میں مزید اضافے کا امکان موجود ہے۔

فلپائن آف سائیکل ریٹ ہائیک پر غور کر رہا ہے، جبکہ ریزرو بینک آف انڈیا کی اگلی مانیٹری پالیسی 5 جون کو متوقع ہے۔

بھارتی مالیاتی منڈیاں جمعرات کو بند رہیں گی۔