امریکا ایران مذاکرات میں غیر یقینی، ڈالر چھ ہفتوں کی بلند ترین سطح پر

امریکا اور ایران کے درمیان ممکنہ امن معاہدے سے متعلق متضاد اشاروں کے باعث عالمی کرنسی مارکیٹ میں غیر یقینی صورتحال برقرار رہی، جبکہ جمعہ کو امریکی ڈالر چھ ہفتوں کی بلند ترین سطح کے قریب مستحکم رہا۔ سرمایہ کار اب بھی مذاکرات میں کسی ممکنہ پیش رفت کی امید لگائے بیٹھے ہیں، تاہم ایران کے یورینیم ذخائر اور آبنائے ہرمز پر کنٹرول کے معاملے پر دونوں ممالک کے درمیان اختلافات برقرار ہیں۔

امریکی وزیر خارجہ مارکو روبیو نے مذاکرات میں کچھ مثبت اشاروں کا ذکر کیا، لیکن اس کے باوجود مارکیٹ میں اتار چڑھاؤ دیکھا گیا۔ ایشیائی ٹریڈنگ کے دوران ڈالر کرنسیوں کی باسکٹ کے مقابلے میں 99.24 پر برقرار رہا، جو گزشتہ سیشن میں حاصل کی گئی 99.515 کی سطح کے قریب ہے، جو 7 اپریل کے بعد بلند ترین سطح تھی۔

یورو معمولی کمی کے ساتھ 1.1613 ڈالر پر آ گیا، جبکہ برطانوی پاؤنڈ 1.3431 ڈالر پر مستحکم رہا۔ گزشتہ ہفتے برطانیہ میں سیاسی بے یقینی کے باعث پاؤنڈ میں 2 فیصد سے زائد کمی آئی تھی، تاہم رواں ہفتے یہ 0.8 فیصد اضافے کی جانب بڑھ رہا ہے۔

امریکی معیشت سے متعلق مثبت اعداد و شمار نے بھی ڈالر کو سہارا دیا۔ رپورٹ کے مطابق امریکا میں بے روزگاری کے ہفتہ وار دعوؤں میں کمی آئی جبکہ مئی میں مینوفیکچرنگ سرگرمی چار سال کی بلند ترین سطح پر پہنچ گئی۔

دوسری جانب مضبوط ڈالر اور بلند تیل قیمتوں کے باعث جاپانی ین دباؤ کا شکار رہا اور 159 ین فی ڈالر کی کمزور سطح کے قریب ٹریڈ کرتا رہا۔ ماہرین کے مطابق جاپانی حکام دوبارہ مداخلت کر سکتے ہیں۔

ادھر انڈونیشیا سمیت ابھرتی ایشیائی معیشتوں کی کرنسیاں بھی عالمی تیل بحران کے باعث شدید دباؤ میں ہیں، جس کے پیش نظر کئی ممالک معیشت کو سہارا دینے کے لیے ہنگامی اقدامات کر رہے ہیں۔