اسکواڈ سے ڈراپ ہونے کے باوجود آزمون کا ایران سے محبت کا اظہار، ورلڈ کپ اسکواڈ کی حمایت

ایرانی فٹبال ٹیم کے اسٹار اسٹرائیکر سردار آزمون نے ورلڈ کپ کے ابتدائی اسکواڈ سے ڈراپ ہونے کے بعد سوشل میڈیا پر جذباتی پیغام شیئر کیا ہے، جس میں انہوں نے وطن سے محبت کا اظہار کرتے ہوئے ٹیم کے لیے نیک خواہشات کا اظہار کیا ہے۔

اپنے ملک کی تاریخ میں دوسرے سب سے زیادہ گول کرنے والے 31 سالہ آزمون کو کوچ امیر قلعہ نوئی نے اسکواڈ سے باہر کر دیا تھا۔ سرکاری میڈیا کے مطابق وہ زخمی ہیں، تاہم رپورٹس کے مطابق دبئی کے حکمران سے ملاقات کی تصویر پوسٹ کرنے پر انہیں ٹیم سے نکالا گیا۔ آزمون نے حب الوطنی پر اٹھنے والے سوالات کا جواب دیتے ہوئے لکھا کہ میرا دل اور میری شناخت صرف ایران ہے۔ میں نے ہمیشہ ملک کے لیے جانفشانی سے کھیلا اور لڑکپن میں دوسری ریاست کی بڑی مالی پیشکش بھی ٹھکرا دی تھی۔انہوں نے مزید لکھا کہ دوستو! جاؤ اور میدان مار لو، ایرانی عوام کے دل خوش کر دو۔

ایرانی اسکواڈ اس وقت ترکیہ میں تربیتی کیمپ میں موجود ہے، جہاں سے وہ جون کے پہلے ہفتے میں ورلڈ کپ کے لیے روانہ ہوگا۔