اٹلی کے شہر موڈینا میں گاڑی کا ہجوم پر حملہ، کم از کم 8 افراد زخمی

اٹلی کے شمالی شہر موڈینا میں ایک شخص نے گاڑی ہجوم پر چڑھا دی، جس کے نتیجے میں کم از کم آٹھ افراد زخمی ہو گئے، جن میں سے چار کی حالت تشویشناک بتائی جا رہی ہے۔

پولیس کے مطابق ڈرائیور ایک 30 سالہ شخص تھا جو برگامو میں پیدا ہوا اور شمالی افریقی نژاد ہے۔ وہ موڈینا کے صوبے میں منتقل ہوا تھا۔ موڈینا کے میئر نے نشریاتی ادارے ری نیوز 24 کو بتایا کہ حادثے کے بعد وہ فرار ہونے کی کوشش کر رہا تھا لیکن اس کی گاڑی ایک دکان کے شیشے سے ٹکرا گئی۔

فرار ہونے والے ڈرائیور کو کچھ راہگیروں نے روک لیا، جن میں سے ایک پر اس نے چاقو سے حملہ کیا اور اسے معمولی زخمی کر دیا۔ بعد ازاں پولیس نے اسے گرفتار کر لیا۔

اطلاعات کے مطابق ڈرائیور کا نفسیاتی امراض کا علاج جاری تھا، تاہم وزارت داخلہ کے ایک ذریعے نے اس کی وجوہات یا ممکنہ دہشت گردی کے پہلو پر کوئی وضاحت نہیں دی۔

میئر ماسیمو میتسیٹی نے ری نیوز 24 کو بتایا کہ زخمیوں میں سے چار کی حالت تشویشناک ہے جبکہ دو افراد کو بولونیا کے اسپتال منتقل کیا گیا ہے، جو موڈینا سے تقریباً 40 کلومیٹر دور ہے۔

میئر نے واقعے کو جان بوجھ کر کیا گیا حملہ قرار دیتے ہوئے کہا کہ بظاہر ڈرائیور نے جان بوجھ کر فٹ پاتھ پر گاڑی چڑھائی اور متعدد افراد کو کچل دیا۔

ایک زخمی شخص نے ری نیوز 24 کو بتایا کہ اس نے لوگوں کو گرتے ہوئے دیکھا اور گاڑی قریب آتے دیکھ کر زمین پر لیٹ گیا۔ اس کے مطابق ڈرائیور ممکنہ طور پر شراب یا منشیات کے زیر اثر تھا، تاہم حکام نے اس کی تصدیق نہیں کی۔

وزیراعظم جارجیا میلونی نے سوشل میڈیا پلیٹ فارم ایکس پر کہا کہ وہ زخمیوں اور ان کے اہل خانہ کے ساتھ ہمدردی کا اظہار کرتی ہیں۔

انہوں نے کہا کہ موڈینا میں پیش آنے والا واقعہ انتہائی سنگین ہے اور انہیں امید ہے کہ ذمہ دار شخص کو اپنے عمل کا مکمل جوابدہ ٹھہرایا جائے گا۔

دوسری جانب دائیں بازو کی مخالف امیگریشن لیگ پارٹی کے رہنما ماتّیو سالوینی نے بھی ایکس پر ردعمل دیتے ہوئے ڈرائیور کے شمالی افریقی پس منظر کا ذکر کیا اور اسے دوسری نسل کا مجرم قرار دیا۔