امریکی و نائجیرین فورسز کا مشترکہ آپریشن: داعش کا نائب کمانڈر المنوکی مارا گیا، ڈونلڈ ٹرمپ

امریکی صدر ڈونلڈ ٹرمپ نے جمعہ کو دعویٰ کیا ہے کہ نائجیریا اور امریکی فورسز کی مشترکہ کارروائی میں داعش کا نائب کمانڈر ابو بلال المنوکی مارا گیا۔

اس کارروائی پر ردِعمل دیتے ہوئے نائجیریا کے صدر بولا احمد ٹینوبو کا کہنا تھا کہ یہ کامیاب حملہ دہشت گردی کے خاتمے کے لیے مشترکہ اور مؤثر حکمتِ عملی کی ایک بہترین مثال ہے۔

امریکی صدر ڈونلڈ ٹرمپ نے کارروائی کے عین مقام کا انکشاف کیے بغیر سوشل میڈیا پلیٹ فارم ٹرتھ سوشل پر لکھا کہ آج رات میری ہدایت پر امریکی اور نائجیریا کی بہادر افواج نے دنیا کے سب سے زیادہ سرگرم دہشت گرد کو میدانِ جنگ سے ختم کرنے کے لیے ایک انتہائی پیچیدہ اور باریک بینی سے تیار کردہ مشن کو بہترین انداز میں سرانجام دیا۔ داعش کے دوسرے کمانڈر ابو بلال المنوکی کا خیال تھا کہ وہ افریقہ میں چھپ سکتا ہے لیکن وہ یہ نہیں جانتا تھا کہ ہمارے پاس ایسے ذرائع موجود ہیں جو ہمیں اس کی ہر نقل و حرکت سے باخبر رکھ رہے تھے۔

نائجیریا کے صدر ٹینوبو نے ایکس پر اپنے بیان میں تصدیق کی کہ جھیل چاڈ کے علاقے میں واقع دہشت گردوں کے ٹھکانے پر کیے گئے اس حملے کے ابتدائی نتائج کے مطابق ابو بلال المنوکی عرف ابو مینوک اپنے متعدد قریبی کمانڈروں اور ساتھیوں سمیت مارا گیا۔

صدر ٹینوبو کا کہنا تھا کہ نائجیریا کی افواج نے امریکی ہم منصبوں کے ساتھ مل کر اس دلیرانہ مشترکہ کارروائی کو کامیابی سے ہمکنار کیا جس سے داعش کے نیٹ ورک کو شدید نقصان پہنچا۔

امریکی سرکاری ریکارڈ کے مطابق نائجیریا سے تعلق رکھنے والے ابو بلال المنوکی کو بائیڈن انتظامیہ نے 2023 میں عالمی دہشت گردوں کی بلیک لسٹ میں شامل کیا تھا۔

امریکی صدر ڈونلڈ ٹرمپ نے آپریشن میں بھرپور تعاون پر نائجیریا کا شکریہ ادا کیا۔

واضح رہے کہ نائجیریا مذہبی تفریق کے الزامات کو مسترد کرتا آیا ہے، حکومت کا کہنا ہے کہ ان کی سیکیورٹی فورسز بلا تفریق ان تمام مسلح جتھوں کے خلاف کارروائی کرتی ہیں جو مسلمانوں اور عیسائیوں دونوں کو نشانہ بناتے ہیں۔