مویشی منڈیوں میں اب نقد رقم کی ضرورت نہیں، اسٹیٹ بینک نے گو کیش لیس مہم شروع کر دی

اسٹیٹ بینک آف پاکستان نے عید الاضحیٰ 2026 کے لیے ملک گیر گو کیش لیس مہم کا آغاز کر دیا ہے، جس کا مقصد ملک بھر کی مویشی منڈیوں میں محفوظ اور آسان ڈیجیٹل لین دین کو فروغ دینا ہے۔

مرکزی بینک کا کہنا ہے کہ یہ اقدام نقد رقم پر انحصار کم کرنے اور پاکستان کے ادائیگیوں کے نظام (پیمنٹ ایکو سسٹم) میں ڈیجیٹلائزیشن کی رفتار تیز کرنے کی وسیع تر حکمت عملی کا حصہ ہے۔ اسٹیٹ بینک کے مطابق عید الاضحیٰ کے دوران مویشی منڈیوں میں بڑے پیمانے پر تجارتی سرگرمیاں دیکھنے میں آتی ہیں، جہاں روایتی طور پر زیادہ تر لین دین نقد رقم کی صورت میں کیا جاتا ہے۔

بینک کا مزید کہنا ہے کہ وہ حالیہ برسوں میں اس موسمی معاشی سرگرمی کو ڈیجیٹل ادائیگیوں کے ذرائع اپنانے کی ترغیب دینے اور مالیاتی شمولیت (فنانشل انکلوژن) کو بہتر بنانے کے لیے استعمال کر رہا ہے۔ گزشتہ مہمات کی بنیاد پر 2026 کے اس اقدام کو نمایاں طور پر وسعت دی گئی ہے، جس کے تحت کوریج کو گزشتہ سال کی 54 مویشی منڈیوں سے بڑھا کر اس سال ملک بھر کی 96 منڈیوں تک کر دیا گیا ہے۔

اس مہم کے تحت 22 شریک بینک متعین کردہ مویشی منڈیوں میں خصوصی کیمپ اور کیوسک قائم کریں گے، تاکہ خریداروں اور فروخت کنندگان کے لیے ڈیجیٹل ادائیگیوں میں سہولت فراہم کی جا سکے۔ بینک مویشی فروشوں، ٹرانسپورٹرز اور دیگر متعلقہ خدمات فراہم کرنے والوں کو اکاؤنٹ کھولنے اور کیو آر کوڈ پر مبنی ادائیگیوں کے حل کے ذریعے ڈیجیٹل پلیٹ فارمز پر منتقل کریں گے۔

اسٹیٹ بینک نے عید کے سیزن کے دوران لین دین کے بڑے حجم کو مدنظر رکھتے ہوئے 14 مئی سے 5 جون 2026 تک ٹرانزیکشنز اور اکاؤنٹ بیلنس کی حد میں عارضی نرمی کا بھی اعلان کیا ہے۔ اس کے علاوہ جہاں ممکن ہو سکے گا، موبائل بینکنگ وینز، اے ٹی ایمز اور کیش ڈپازٹ مشینیں بھی نصب کی جائیں گی، تاکہ مویشی منڈیوں اور ان کے گردونواح میں مالیاتی خدمات تک رسائی کو بہتر بنایا جا سکے۔

مرکزی بینک نے عوام کی حوصلہ افزائی کی ہے کہ وہ عید سے متعلق لین دین کے لیے موبائل بینکنگ ایپس، برانچ لیس بینکنگ والٹس، ’راست‘ سروسز اور کیو آر کوڈ پیمنٹس کا استعمال کریں۔ بینک کا کہنا ہے کہ ڈیجیٹل ادائیگیاں زیادہ سہولت اور تحفظ فراہم کرتی ہیں اور نقد رقم ساتھ رکھنے سے وابستہ خطرات کو کم کرتی ہیں۔ اسٹیٹ بینک نے مزید کہا کہ یہ اقدام پاکستان میں ایک زیادہ موثر، شفاف اور جامع مالیاتی نظام کی تشکیل میں بھی مددگار ثابت ہوگا۔