امریکا کا فینٹانائل معاملے پر بھارتی کمپنی سے منسلک 13 افراد پر ویزا پابندیاں عائد کرنے کا فیصلہ

امریکہ نے اعلان کیا ہے کہ وہ بھارت کی آن لائن فارمیسی کے ایس انٹرنیشنل ٹریڈرز سے منسلک 13 افراد پر ویزا پابندیاں عائد کر رہا ہے، جن پر جعلی نسخہ جاتی ادویات میں خطرناک منشیات فینٹانائل شامل کر کے فروخت کرنے کا الزام ہے۔

امریکی محکمہ خارجہ کے مطابق یہ 13 افراد کمپنی کے قریبی ساتھی ہیں، جو بھارت میں کام کرتی ہے، جبکہ اس کے مالک کو بھی اس معاملے سے جوڑا گیا ہے۔

محکمہ خارجہ نے کہا کہ ممبئی میں قائم اس کمپنی کی ویب سائٹ امریکی ریکارڈز میں موجود ہونے کے باوجود قابلِ رسائی نہیں رہی، جبکہ اس کے اعلیٰ عہدیداروں کی تفصیلات بھی دستیاب نہیں ہیں۔

بھارت کی وزارتِ خارجہ اور وزارت صحت نے اس پر فوری ردعمل نہیں دیا۔

امریکی محکمہ خارجہ کے مطابق کمپنی فینٹانائل کی غیر قانونی اسمگلنگ کے ذریعے آمدن حاصل کر رہی تھی، جسے امریکہ نے انتہائی خطرناک منشیات قرار دیا ہے۔ فینٹانائل ایک طاقتور اوپیئڈ ہے جو زیادہ تر درد کے علاج میں استعمال ہوتا ہے لیکن اس کا غلط استعمال بڑی تعداد میں اموات کا سبب بنتا ہے۔

امریکہ کے مطابق اس کمپنی نے لاکھوں جعلی گولیاں امریکہ میں فروخت کیں، جس سے متعدد خاندان متاثر ہوئے۔ گزشتہ سال بھی اسی کمپنی پر اسی نوعیت کی پابندیاں عائد کی گئی تھیں۔