سیکرٹ سروس کا وائٹ ہاؤس کے قریب مسلح مشتبہ شخص سے فائرنگ کا تبادلہ

امریکی سیکرٹ سروس نے پیر کے روز بتایا ہے کہ اس کے اہلکاروں نے وائٹ ہاؤس کے قریب ایک مسلح اور مشکوک شخص کا سامنا کیا، جس نے بعد ازاں اہلکاروں پر فائرنگ کی اور پھر پیدل فرار ہونے کی کوشش کی، تاہم اسے قانون نافذ کرنے والے اداروں کی فائرنگ سے زخمی حالت میں قابو کر لیا گیا۔

یہ واقعہ واشنگٹن ڈی سی میں پیش آیا، جس کے باعث وائٹ ہاؤس کو مختصر وقت کے لیے لاک ڈاؤن کر دیا گیا۔

امریکی سیکرٹ سروس کے ڈپٹی ڈائریکٹر میتھیو کوئن کے مطابق گشت کرنے والے اہلکاروں نے ایک شخص کو دیکھا جو مشکوک رویہ اختیار کیے ہوئے تھا اور جس کے پاس ہتھیار ہونے کے آثار تھے۔ جب اہلکاروں نے اسے روکنے کی کوشش کی تو وہ فرار ہو گیا اور اس نے اہلکاروں کی سمت فائرنگ کی۔

اس کے بعد سیکیورٹی اہلکاروں نے جوابی فائرنگ کی جس سے وہ شخص زخمی ہوا اور اسے اسپتال منتقل کر دیا گیا۔ واقعے میں ایک کم عمر راہ گیر بھی متاثر ہوا تاہم اسے جان لیوا چوٹیں نہیں آئیں۔

حکام کے مطابق واقعے کی تحقیقات واشنگٹن پولیس کر رہی ہے جبکہ اسلحہ بھی برآمد کر لیا گیا ہے۔ وائٹ ہاؤس میں موجود امریکی صدر ڈونلڈ ٹرمپ اس وقت محفوظ تھے۔