ڈالر کے مقابلے روپے کی قدر میں بہتری کا سلسلہ جاری

انٹر بینک مارکیٹ میں جمعہ کو بھی ڈالر کے مقابلے روپے کی قدر میں معمولی اضافہ ریکارڈ کیا گیا ۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.85 روپے پر بند ہوا۔

یاد رہے کہ جمعرات کو مقامی کرنسی 278.86 روپے پر بند ہوئی تھی۔

دریں اثنا اسٹیٹ بینک ابھرتے میکرو اکنامک اور بیرونی حالات کے پیشِ نظر کلیدی پالیسی ریٹ کا جائزہ لینے کے لیے 27 اپریل کو سال 2026 کا تیسرا مانیٹری پالیسی کمیٹی کا اجلاس طلب کرنے والا ہے۔

مزید برآں جمعہ کو ڈالر گزشتہ تین ہفتوں میں پہلی بار ہفتہ وار اضافے کی جانب گامزن نظر آیا۔

امریکی ڈالر انڈیکس 98.82 پر برقرار رہا اور 0.58 فیصد ہفتہ وار اضافے کی جانب گامزن ہے۔ یورو کی قیمت 1.1683 ڈالر پر مستحکم رہی جب کہ اسٹرلنگ 0.02 فیصد کمی کے ساتھ 1.3464 ڈالر پر آگیا۔

ماتسوئی سیکیورٹیز کے مارکیٹ تجزیہ کار شو سوزوکی کا کہنا ہے کہ خام تیل اور ڈالر کی قیمتیں اب بھی ایک ساتھ حرکت کررہی ہیں اور تیل کی قیمتوں میں بتدریج اضافے کے ساتھ، میں کہوں گا کہ ڈالر کی پوزیشن اب بھی کافی مستحکم ہے۔