ڈالر کے مقابلے میں روپیہ مزید مضبوط

انٹربینک مارکیٹ میں جمعرات کو ڈالر کے مقابلے روپے کی قدر میں معمولی اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی بہتری سے 278.86 روپے پر بند ہوا۔

یاد رہے کہ بدھ کو مقامی کرنسی 278.87 پر بند ہوئی تھی۔

دریں اثنا جمعرات کو امریکی ڈالر ڈیڑھ ہفتے کی بلند ترین سطح کے قریب ڈگمگاتا رہا۔

یورو کی قدر 1.1712 ڈالر رہی جبکہ اسی سیشن کے آغاز میں یہ 13 اپریل کے بعد اپنی کم ترین سطح کو چھو چکا تھا۔ یورپی مشترکہ کرنسی اس ہفتے 0.4 فیصد گراوٹ کی جانب گامزن ہے جو گزشتہ چار ہفتوں میں اس کی پہلی کمی ہوگی۔ دوسری جانب برطانوی پاؤنڈ (اسٹرلنگ) 1.3497 ڈالر پر مستحکم رہا۔

مارچ کے دوران جنگ چھڑنے کی وجہ سے محفوظ سرمایہ کاری کی طلب کے باعث ڈالر کو فائدہ پہنچا لیکن اس ماہ کے آغاز میں امن معاہدے اور جنگ بندی کے امکان نے سرمایہ کاروں کے حوصلے بلند کیے جس کے نتیجے میں امریکی کرنسی نے اپنے زیادہ تر فوائد کھودیے۔

امریکی ڈالر انڈیکس 98.644 پر رہا جو 13 اپریل کے بعد اس کی بلند ترین سطح کے قریب ہے۔ مسلسل دو ہفتوں کی گراوٹ کے بعد یہ انڈیکس اس ہفتے 0.4 فیصد کے معمولی اضافے کی جانب گامزن ہے۔

مزید برآں گزشتہ سیشن میں ہونے والے بڑے اضافے کے بعد جمعرات کو تیل کی قیمتوں میں معمولی کمی دیکھی گئی۔

برینٹ کروڈ کے سودے 15 سینٹس کی کمی کے ساتھ 101.76 ڈالر فی بیرل پر آگئے جبکہ بدھ کو قیمت دو ہفتوں سے زیادہ عرصے کے بعد پہلی بار 100 ڈالر سے اوپر بند ہوئی تھی۔ ویسٹ ٹیکساس انٹرمیڈیٹ کے سودے 14 سینٹس کی کمی کے ساتھ 92.82 ڈالر پر آگئے۔