میڈرڈ اوپن میں شکست کے باوجود وینس ولیمز کلے کورٹ پر برقرار، فرنچ اوپن کی تیاریاں شروع

وینس ولیمز نے میڈرڈ اوپن کے پہلے راؤنڈ میں شکست کے باوجود رواں برس فرنچ اوپن میں شرکت کی خواہش کا اظہار کیا ہے۔ 45 سالہ امریکی ٹینس اسٹار پانچ سال بعد کلے کورٹ پر واپسی کر رہی ہیں۔

منگل کو میڈرڈ اوپن کے افتتاحی راؤنڈ میں وینس ولیمز کو ہم وطن کھلاڑی کیٹلن کیوڈو کے ہاتھوں 6-2 اور 6-4 سے شکست کا سامنا کرنا پڑا۔ گزشتہ سیزن کے وسط میں 16 ماہ کے طویل وقفے کے بعد واپسی کرنے والی وینس کی یہ مسلسل 10 ویں انفرادی شکست ہے۔ سات مرتبہ کی گرینڈ سلیم چیمپئن کو اب رولینڈ گیروس (فرنچ اوپن) میں ایکشن میں نظر آنے کے لیے وائلڈ کارڈ کی ضرورت ہوگی۔

صحافیوں سے گفتگو کرتے ہوئے وینس ولیمز نے کہا کلے کورٹ پر دوبارہ قدم جمانے کے لیے یہ ایک بہترین آغاز تھا۔ بدقسمتی سے دیگر مصروفیات کی وجہ سے میں روم اوپن میں شرکت نہیں کر سکوں گی، جس کا مجھے بے حد دکھ ہے کیونکہ میرے شوہر اطالوی ہیں اور ہم وہاں جانا چاہتے تھے۔

انہوں نے مزید کہا کہ میں نے برسوں سے کلے کورٹ پر ٹینس نہیں کھیلی، لیکن مجھے اس پر کھیلنا پسند ہے۔ آج کے میچ کے آخری لمحات میں مجھے محسوس ہوا کہ میں کورٹ پر بہتر کھیل رہی ہوں۔ ان تمام چیزوں کے لیے ہم آہنگی کی ضرورت ہوتی ہے۔واضح رہے کہ فرنچ اوپن کا آغاز 24 مئی سے ہوگا۔