پی ایم اے کاکول میں 153ویں پی ایم اے لانگ کورس کی پاسنگ آؤٹ پریڈ کا انعقاد

پاکستان ملٹری اکیڈمی (پی ایم اے) کاکول میں 153 ویں پی ایم اے لانگ کورس، 38 ویں ٹیکنیکل گریجویٹ کورس، 72 ویں انٹیگریٹڈ کورس، 15 ویں مجاہد کورس اور 27 ویں لیڈی کیڈٹ کورس کے کیڈٹس کی پاسنگ آؤٹ پریڈ کا انعقاد کیا گیا۔

ہفتہ کو پاک فوج کے شعبہ تعلقات عامہ (آئی ایس پی آر) کی جانب سے جاری پریس ریلیز کے مطابق پاکستان ملٹری اکیڈمی سے عراق، مالدیپ، مالی، نیپال، فلسطین، قطر اور سری لنکا سمیت متعدد دوست ممالک کے کیڈٹس نے بھی گریجویشن کی ہے۔

پاک فضائیہ کے سربراہ ایئر چیف مارشل ظہیر احمد بابر سدھو نشان امتیاز (ملٹری) ہلال جرات نے بطور مہمان خصوصی تقریب میں شرکت کی ۔

سربراہ پاک فضائیہ نے پریڈ کا معائنہ کیا اور ممتاز کیڈٹس کو اعزازات سے بھی نوازا۔

• 153 ویں پی ایم اے لانگ کورس کے اکیڈمی کے سینئر انڈر آفیسر بلال نسیم کو اعزازی تلوار سے نوازا گیا۔
• 153 ویں پی ایم اے لانگ کورس کے بٹالین کے سینئر انڈر آفیسر محمد سعد موسیٰ کو پریذیڈنٹ گولڈ میڈل اور 153 ویں پی ایم اے لانگ کورس کے دوست ملک نیپال سے تعلق رکھنے والے سینئر انڈر آفیسر پوبن کنور کو چیف آف ڈیفنس فورسز اوورسیز گولڈ میڈل سے نوازا گیا۔
• 153 ویں پی ایم اے لانگ کورس کے جنٹلمین کیڈٹ مسعود الرحمان کو مارکس مین میڈل سے نوازا گیا۔
• 38 ویں ٹیکنیکل گریجویٹ کورس کے انڈر آفیسر حیدر بن عابد کو چیف آف آرمی اسٹاف کین سے نوازا گیا۔
• 15ویں مجاہد کورس کے سارجنٹ پیر محمد عبداللہ شاہ کو ’چیف آف آرمی اسٹاف کین سے نوازا گیا۔
• 72 ویں انٹیگریٹڈ کورس کے کورس انڈر آفیسر علی بن وقار اور 27 ویں لیڈی کیڈٹ کورس کی انڈر آفیسر ولیہ زیب کو کمانڈنٹ کینز سے نوازا گیا۔