کفایت شعاری پالیسی: سندھ میں کاروباری اوقات محدود، مارکیٹیں 9 بجے بند

حکومت سندھ نے جمعہ کو صوبے بھر میں کفایت شعاری پالیسی کے تحت بازاروں، ریسٹورنٹ اور شادی ہالوں کے لیے نئے اوقات کار نافذ کر دیے ہیں، جس کا باقاعدہ نوٹیفکیشن فوری طور پر جاری کر دیا گیا ہے۔

نئے شیڈول کے تحت تمام اضلاع میں دکانیں، مارکیٹیں اور شاپنگ مالز رات 8 بجے بند ہوں گے، تاہم ڈویژنل ہیڈ کوارٹرز میں کاروبار رات 9 بجے تک کرنے کی اجازت ہوگی۔ ان پابندیوں کا اطلاق ہفتے کے ساتوں دن بشمول ویک اینڈز پر ہوگا۔

ریسٹورنٹ اور کھانے پینے کے مراکز کو صرف رات کے کھانے کے اوقات یعنی شام 7 بجے سے رات ساڑھے 11 بجے تک کھلنے کی اجازت ہوگی۔

البتہ ٹیک اوے اور ہوم ڈیلیوری سروسز ان پابندیوں سے مستثنیٰ رہیں گی۔ شادی ہالوں اور بینکوئٹ ہالز کو رات 8 بجے سے آدھی رات تک تقریبات منعقد کرنے کی اجازت دی گئی ہے۔

ضروری خدمات بشمول تندور، دودھ اور دہی کی دکانیں، بیکریاں، میڈیکل اسٹورز، لیبارٹریز، کلینکس، اسپتال اور پیٹرول پمپس ان پابندیوں سے مستثنیٰ ہوں گے۔ حکومت نے کمشنرز اور ڈپٹی کمشنرز کو ہدایت کی ہے کہ وہ سندھ پولیس کے تعاون سے نئے اوقات کار پر سختی سے عمل درآمد کو یقینی بنائیں۔

وزیر اعظم شہباز شریف نے 9 مارچ کو مشرق وسطیٰ کے تنازع کے ممکنہ معاشی اثرات کے پیش نظر کفایت شعاری اور توانائی کی بچت کے وسیع اقدامات کا اعلان کیا تھا، جس میں سرکاری دفاتر کے لیے چار روزہ ورک ویک بھی شامل ہے۔ قوم سے خطاب میں وزیر اعظم نے کہا تھا کہ ایندھن کی بچت کی کوششوں کے تحت سرکاری دفاتر ہفتے میں صرف چار دن کام کریں گے جبکہ ایک اضافی ہفتہ وار چھٹی متعارف کرائی گئی ہے۔

انہوں نے مزید کہا کہ 50 فیصد سرکاری عملہ گھر سے کام کرے گا، جبکہ اسکول اگلے ہفتے سے دو ہفتوں کے لیے بند رہیں گے، تاہم بینک معمول کے مطابق کام جاری رکھیں گے۔