ایران جنگ کے بڑھتے خطرات، ڈالر کی قدر مستحکم

عالمی کرنسی مارکیٹ میں پیر کے روز امریکی ڈالر مستحکم رہا، جبکہ جاپانی ین 160 فی ڈالر کی اہم حد کے قریب ٹریڈ کرتا رہا۔ سرمایہ کار ایران اور امریکا کے درمیان بڑھتی ہوئی کشیدگی اور آبنائے ہرمز سے متعلق امریکی صدر ڈونلڈ ٹرمپ کی نئی ڈیڈ لائن پر نظر رکھے ہوئے ہیں۔

ٹرمپ نے اتوار کے روز اپنے سوشل میڈیا بیان میں دھمکی دی تھی کہ اگر ایران نے منگل کی شام تک آبنائے ہرمز نہ کھولی تو وہ ایران کے پاور پلانٹس اور پلوں کو نشانہ بنا سکتے ہیں۔ اس صورتحال نے عالمی منڈیوں میں غیر یقینی کیفیت کو مزید بڑھا دیا ہے۔

ایشیا اور یورپ میں تعطیلات کے باعث پیر کے روز مارکیٹ میں کاروباری سرگرمیاں محدود رہیں، تاہم مجموعی طور پر سرمایہ کاروں میں خطرے سے بچنے کا رجحان دیکھا گیا۔ ماہرین کے مطابق یہ صورتحال تیل کی قیمتوں، مہنگائی اور شرح سود کی پالیسیوں پر براہ راست اثر ڈال رہی ہے، جس کی وجہ سے ڈالر کو محفوظ سرمایہ کاری کے طور پر ترجیح دی جا رہی ہے۔

ڈالر انڈیکس 100.2 کی سطح پر مستحکم رہا، جبکہ یورو اور برطانوی پاؤنڈ میں معمولی کمی دیکھی گئی۔ آسٹریلوی ڈالر بھی کمزور رجحان کے باوجود معمولی بہتری کے ساتھ 0.6893 ڈالر پر ٹریڈ ہوا۔

مارکیٹ تجزیہ کاروں کے مطابق ایران جنگ کے باعث آبنائے ہرمز کی بندش نے عالمی تیل کی قیمتوں کو 100 ڈالر فی بیرل سے اوپر پہنچا دیا ہے، جس سے مہنگائی اور عالمی معیشت کی شرح نمو پر دباؤ بڑھ گیا ہے۔

جاپانی ین 159.77 فی ڈالر پر آگیا، جو گزشتہ 21 ماہ کی کم ترین سطح کے قریب ہے۔ جاپانی حکام نے کرنسی مارکیٹ میں مداخلت کا عندیہ دیا ہے، تاہم ماہرین کا کہنا ہے کہ موجودہ عالمی حالات میں ین پر دباؤ برقرار رہنے کا امکان ہے۔