مشرق وسطیٰ جنگ : بیرک گولڈ کا پاکستان میں سونے اور تانبے کے منصوبے میں تاخیر کا فیصلہ

فنانشل ٹائمز نے اپنی ایک رپورٹ میں بتایا ہے کہ مشرقِ وسطیٰ کے تنازع اور پاکستان میں بگڑتی ہوئی سیکیورٹی صورتحال کے باعث بیرک مائننگ اپنے تانبے اور سونے کے بڑے منصوبے میں تاخیر کر رہی ہے۔ اخبار نے یہ دعویٰ متعلقہ خط و کتابت دیکھنے کے بعد کیا ہے۔

رپورٹ کے مطابق بیرک گولڈ نے اپنے پاکستانی شراکت داروں اور مقامی آپریٹر کو بتایا کہ ابتدائی جائزوں اور پاکستان و مشرقِ وسطیٰ میں سیکیورٹی مسائل میں حالیہ اضافے کے پیشِ نظر کمپنی ضروری سمجھتی ہے کہ اس کے ممکنہ اثرات اور ترسیلی حکمت عملی کا مزید جائزہ لیا جائے۔

کمپنی نے مزید کہا کہ جولائی سے شروع ہونے والے 12 ماہ کے عرصے کے لیے ترقیاتی سرگرمیوں کی رفتار سست کر دی جائے گی اور اس کے مطابق منصوبے پر ہونے والے اخراجات میں بھی کمی کی جائے گی۔ خبر رساں ادارے رائٹر کی جانب سے تبصرے کی درخواست پر بیرک مائننگ نے فوری طور پر کوئی جواب نہیں دیا۔

گزشتہ ماہ بیرک کے سی ای او مارک ہِل نے مالیاتی نتائج کے بعد ایک کال کے دوران کہا تھا کہ کمپنی کا بورڈ بلوچستان میں سونے اور تانبے کے منصوبے کے تمام پہلوؤں کا جائزہ لے رہا ہے۔ کمپنی کے مطابق ریکوڈک منصوبے کے سیکیورٹی انتظامات، ترقیاتی ٹائم ٹیبل اور کیپیٹل بجٹ کا جائزہ فوری طور پر شروع کر دیا جائے گا اور عمل مکمل ہونے کے بعد تفصیلات فراہم کی جائیں گی۔

واضح رہے کہ سونے اور تانبے کا یہ منصوبہ 50 فیصد بیرک گولڈ، 25 فیصد تین وفاقی سرکاری اداروں اور 25 فیصد حکومتِ بلوچستان کی ملکیت ہے۔