ڈالر کے مقابلے میں روپے کی قدر میں اضافہ

انٹر بینک مارکیٹ میں منگل کو ڈالر کے مقابلے میں روپے کی قدر میں 0.01 فیصد کا معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.22 روپے پر بند ہوا۔

یاد رہے کہ جمعرات کو مقامی کرنسی 279.25 روپے پر بند ہوئی تھی۔

عالمی سطح پر امریکی صدر ڈونلڈ ٹرمپ کی جانب سے ایران کے پاور گرڈ پر بمباری کے فیصلے میں تاخیر کے بعد ہفتے کے ایک ہنگامہ خیز آغاز کے دوران منگل کو ڈالر کو بڑی کرنسیوں کے مقابلے میں شدید مندی کا سامنا کرنا پڑا۔

ڈالر انڈیکس، جو دیگر اہم کرنسیوں کے مقابلے میں امریکی کرنسی کی قدر کی پیمائش کرتا ہے، پیر کو دو ہفتوں کی کم ترین سطح پر گرنے کے بعد 0.2 فیصد اضافے کے ساتھ 99.35 پر آ گیا۔ ابتدائی تجارت میں آسٹریلوی ڈالر 0.2 فیصد گر کر 0.6993 ڈالر پر آگیا، جو اپنی چھ ہفتوں کی بلند ترین سطح سے نیچے آگیا ہے۔

دوسری جانب منگل کو سپلائی کے خدشات کی وجہ سے تیل کی قیمتوں میں اضافہ ہوا، کیونکہ ایران نے خلیج میں جنگ کے خاتمے کے لیے امریکہ کے ساتھ مذاکرات کی تردید کی ہے۔ یہ ایرانی مؤقف امریکی صدر کے اس بیان کے برعکس تھا جس میں انہوں نے کہا تھا کہ جلد ہی کوئی معاہدہ طے پا سکتا ہے۔

برینٹ فیوچرز 2.89 ڈالر یا 2.9 فیصد اضافے کے ساتھ 102.83 ڈالر فی بیرل پر پہنچ گئے، جبکہ امریکی ویسٹ ٹیکساس انٹرمیڈیٹ (ڈبلیوٹی آئی) 2.49 ڈالر یا 2.8 فیصد اضافے کے ساتھ 90.62 ڈالر پر آگیا۔

واضح رہے کہ پیر کو خام تیل کی قیمتوں میں 10 فیصد سے زائد کی کمی دیکھی گئی تھی، جب صدر ٹرمپ نے ایران کے پاور پلانٹس پر حملوں میں پانچ دن کی تاخیر کا حکم دیتے ہوئے کہا تھا کہ گمنام ایرانی حکام کے ساتھ بات چیت میں بڑے اتفاقِ رائے کے نکات سامنے آئے ہیں۔