ورلڈ کپ 2026 : کائیلیان ایم باپے کی مکمل فٹنس کے ساتھ میدان میں واپسی

فرانسیسی فٹ بال اسٹار اور ریال میڈرڈ کے مایہ ناز اسٹرائیکر کائیلیان ایم باپے نے گھٹنے کی تکلیف سے مکمل نجات اور سو فیصد فٹنس کا اعلان کر دیا ہے۔ 27 سالہ مباپے جو گزشتہ سیزن سے جاری انجری کے باعث 2026 کے آغاز میں چار اہم لیگ میچز سے باہر رہے تھے، اب دوبارہ ایکشن میں نظر آئیں گے۔

حال ہی میں ایٹلیٹیکو میڈرڈ کے خلاف سنسنی خیز مقابلے میں وہ 64 ویں منٹ میں متبادل کھلاڑی کے طور پر میدان میں اترے، جہاں ان کی ٹیم نے 2-3 سے کامیابی حاصل کی۔

ہسپانوی اخبار اے ایس سے گفتگو کرتے ہوئے باپے کا کہنا تھا کہ وہ ورلڈ کپ سے قبل ریال میڈرڈ کے تمام بقیہ میچز کھیلنا چاہتے ہیں۔ انہوں نے واضح کیا کہ ان کی تیاری کا بہترین طریقہ یہی ہے کہ وہ اپنے کلب کے لیے گول کریں، ٹائٹل جیتیں اور آخری لمحے تک لڑیں ،تاکہ میگا ایونٹ میں اپنی بہترین فارم کے ساتھ پہنچ سکیں۔

واضح رہے کہ باپے کو برازیل اور کولمبیا کے خلاف شیڈول دوستانہ میچوں کے لیے فرانسیسی اسکواڈ کا حصہ بنا لیا گیا ہے، جو امریکہ میں کھیلے جائیں گے۔ 2026 کا ورلڈ کپ امریکہ، کینیڈا اور میکسیکو کی مشترکہ میزبانی میں 11 جون سے شروع ہو رہا ہے، جہاں فرانس کو گروپ آئی میں ناروے اور سینیگال جیسی سخت ٹیموں کا سامنا کرنا ہوگا۔ کائیلیان ایم باپے کی واپسی نے فرانسیسی شائقین میں امید کی نئی لہر دوڑا دی ہے۔