ایران کی ورلڈکپ کیلئے تیاریاں جاری، مگر امریکہ میں نہیں کھیلے گا، فٹ بال چیف کا بیان

ایرانی فٹ بال فیڈریشن کے صدر مہدی تاج نے واضح کیا ہے کہ ایران کی قومی ٹیم ورلڈ کپ کی تیاری جاری رکھے ہوئے ہے اور ٹورنامنٹ سے دستبردار ہونے کا کوئی ارادہ نہیں رکھتی، تاہم ٹیم امریکہ میں میچز نہیں کھیلے گی۔ فروری کے آخر میں ایران اور امریکہ کے درمیان شروع ہونے والے تنازع کے بعد ایران کی شرکت پر شکوک و شبہات پیدا ہو گئے تھے۔

ورلڈ کپ کا انعقاد 11 جون سے 19 جولائی تک امریکہ، میکسیکو اور کینیڈا میں ہو رہا ہے۔ ایران کے گروپ مرحلے کے تینوں میچز امریکہ میں شیڈول ہیں لیکن مہدی تاج کے مطابق ایرانی فیڈریشن فیفا کے ساتھ مذاکرات کر رہی ہے، تاکہ یہ میچز میکسیکو منتقل کیے جاسکیں۔ انہوں نے دو ٹوک الفاظ میں کہا کہ ہم امریکہ کا بائیکاٹ کرینگے لیکن ورلڈ کپ کا نہیں۔

اس دوران ایرانی ٹیم ترکیہ میں تربیتی کیمپ لگائے ہوئے ہے جہاں وہ نائیجیریا اور کوسٹاریکا کے خلاف دوستانہ میچز کھیلے گی۔ یہ ٹورنامنٹ مشرق وسطیٰ کی صورتحال کے باعث اردن سے منتقل کیا گیا تھا۔ دوسری جانب ایرانی خواتین کی ٹیم آسٹریلیا میں ویمن ایشین کپ کے بعد وطن واپس پہنچ گئی ہے۔ آسٹریلیا نے کھلاڑیوں کو سیاسی پناہ کی پیشکش کی تھی، جسے صرف دو کھلاڑیوں نے قبول کیا۔

امریکی صدر ڈونلڈ ٹرمپ نے ایرانی مردوں کی ٹیم کی امریکہ آمد پر تحفظات کا اظہار کیا تھا، جسے بنیاد بنا کر مہدی تاج نے وینیو کی تبدیلی کا مطالبہ کیا ہے۔ میکسیکن صدر کلاڈیا شینبام نے نیوزی لینڈ، بیلجیم اور مصر کے خلاف ایران کے میچز کی میزبانی پر آمادگی ظاہر کی ہے، تاہم حتمی فیصلہ فیفا کرے گا۔ فیفا کا کہنا ہے کہ وہ ایران کے ساتھ رابطے میں ہے مگر فی الحال میچز شیڈول کے مطابق کروانے کا ارادہ رکھتا ہے۔