کھلاڑیوں کی فلاح و بہبود میں آئی پی ایل، دی ہنڈریڈ اور ایس اے 20 سے پیچھے، ورلڈ کرکٹرز ایسوسی ایشن

انڈین پریمیئر لیگ (آئی پی ایل) مالیاتی اعتبار سے بہت بڑا نام ہے، جس نے دنیا بھر میں فرنچائز کرکٹ کا جال بچھایا لیکن کھلاڑیوں کے حقوق اور فلاح و بہبود کے معاملے میں یہ اب بھی بہتری کی گنجائش رکھتی ہے۔ ورلڈ کرکٹرز ایسوسی ایشن (ڈبلیو سی اے) کی حالیہ درجہ بندی میں آئی پی ایل 62.6 پوائنٹس کے ساتھ تیسرے نمبر پر رہی، جبکہ انگلینڈ کی دی ہنڈریڈ (75.2) پہلے اور جنوبی افریقہ کی ایس اے 20 (68) دوسرے نمبر پر ہے۔

دنیا کے اس امیر ترین ٹورنامنٹ نے کھلاڑیوں کے اوسط معاوضے اور ادائیگیوں کی شفافیت میں تو بہترین پوائنٹس حاصل کیے، لیکن تنظیم سازی کے حق اور تنازعات کے حل جیسے شعبوں میں یہ پیچھے رہ گیا۔ ڈبلیو سی اے کے چیف ایگزیکٹو ٹام موفٹ کا کہنا ہے کہ ڈومیسٹک لیگز کی ترقی کھیل کے لیے مثبت ہے مگر کھلاڑیوں کے تحفظ اور معیارات کو یقینی بنانا ضروری ہے۔

رپورٹ میں بھارتی بورڈ کی اس پالیسی پر بھی تنقید کی گئی ہے جس کے تحت وہ اپنے کھلاڑیوں کو دیگر عالمی لیگز میں شرکت سے روکتا ہے۔ آئی پی ایل کا 19 واں ایڈیشن 28 مارچ سے شروع ہو رہا ہے، جہاں دفاعی چیمپئن رائل چیلنجرز بنگلور اور سن رائزرز حیدرآباد مدمقابل ہوں گے۔