کراچی سمیت سندھ کے مختلف اضلاع میں بارش کا امکان

محکمہ موسمیات (پی ایم ڈی) نے پیر کو کراچی اور سندھ کے کئی دیگر اضلاع میں گرج چمک کے ساتھ بارش کی پیش گوئی کی ہے۔ منگل (کل) سے ملک کے مغربی علاقوں میں مغربی ہواؤں کا ایک نیا سلسلہ داخل ہونے کا امکان ہے۔

محکمہ موسمیات کے مطابق سندھ کے کئی اضلاع میں تیز ہواؤں اور گرج چمک کے ساتھ بارش کا امکان ہے جبکہ بعض مقامات پر ژالہ باری (اولے پڑنے) کی بھی توقع ہے۔

رپورٹ کے مطابق جامشورو، حیدرآباد، ٹھٹھہ، سجاول، بدین، مٹیاری، ٹنڈو محمد خان، ٹنڈو اللہ یار، عمرکوٹ، تھرپارکر، سانگھڑ، میرپورخاص، نوشہرو فیروز، شہید بینظیر آباد، دادو اور کراچی ڈویژن میں بارش کا امکان ہے۔

لاڑکانہ، قمبر شہداد کوٹ، شکارپور، جیکب آباد، کشمور، گھوٹکی اور سکھر میں بھی تیز ہواؤں اور گرج چمک کے ساتھ بارش کی توقع ہے جب کہ 18 اور 19 مارچ کے دوران بارش کے ان سلسلوں کے درمیان وقفہ بھی آسکتا ہے۔

محکمہ موسمیات نے عوام کو پیش گوئی کے دوران مختلف مقامات پر آسمانی بجلی گرنے کے خطرات سے متعلق خبردار کیا ہے۔

مزید برآں، کسانوں کو مشورہ دیا گیا ہے کہ وہ تیز ہواؤں یا ژالہ باری سے ہونے والے کسی بھی ممکنہ نقصان سے بچنے کے لیے ضروری احتیاطی تدابیر اختیار کریں اور اپنے فصلوں کے معاملات کو موجودہ موسمی حالات کے مطابق ترتیب دیں۔