ناقابلِ شکست بھارت تیسری بار ٹی ٹوئنٹی ورلڈ چیمپئن، احمد آباد میں نیوزی لینڈ کو شکست

بھارتی کرکٹ ٹیم نے وائٹ بال کرکٹ میں اپنی حکمرانی ثابت کرتے ہوئے نیوزی لینڈ کو 96 رنز سے ہرا کر تیسری بار ٹی ٹوئنٹی ورلڈ کپ کا تاج اپنے سر سجا لیا۔ اس تاریخی فتح پر عالمی کرکٹ کے حلقوں نے بھارت کو ناقابلِ شکست قرار دیتے ہوئے اسے زبردست خراجِ تحسین پیش کیا ہے۔

اوپنر سنجو سیمسن نے مسلسل تیسری بار 80 سے زائد رنز کی اننگز کھیل کر اپنی شاندار فارم برقرار رکھی اور ’پلیئر آف دی ٹورنامنٹ‘ کا اعزاز حاصل کیا۔ دوسری جانب جسپریت بمراہ نے اپنی جادوئی بولنگ سے فلیٹ پچ پر محض 15 رنز دے کر 4 وکٹیں اڑائیں اور ’پلیئر آف دی میچ‘ قرار پائے۔

سابق برطانوی کپتان ناصر حسین اور مائیکل ایتھرٹن نے بھارتی ٹیم کے غلبے کی تعریف کرتے ہوئے کہا کہ طاقتور بیٹنگ لائن اپ اور بمراہ جیسے باصلاحیت بولر کا امتزاج بھارت کو دنیا کی سب سے بہترین وائٹ بال ٹیم بناتا ہے۔ انہوں نے یاد دلایا کہ حالیہ 32 میچوں میں سے 30 میں فتح بھارتی برتری کا واضح ثبوت ہے۔

سابق پاکستانی فاسٹ بولر شعیب اختر نے بھارت کی کامیابی کا سہرا ان کے مضبوط سسٹم، طویل مدتی منصوبہ بندی اور درست وقت پر درست لوگوں کو مواقع فراہم کرنے کے سر باندھا۔ ویرات کوہلی، سچن ٹنڈولکر اور روہت شرما سمیت دیگر نامور کھلاڑیوں نے بھی اس کامیابی کو سراہا۔

کپتان سوریا کمار یادو کا کہنا ہے کہ اب ان کی نظریں 2028 کے اولمپکس میں گولڈ میڈل جیتنے پر مرکوز ہیں۔