عمان کی دقم بندرگاہ پر ڈرون حملہ، فیول ٹینک نشانہ بن گیا

عمان کی دقم تجارتی بندرگاہ پر منگل کے روز ایندھن کے ایک ٹینک کو اس وقت نشانہ بنایا گیا جب بندرگاہ پر متعدد ڈرون طیاروں سے حملہ کیا گیا۔ عمان کی سرکاری خبر رساں ایجنسی نے سیکیورٹی ذرائع کے حوالے سے بتایا کہ یہ واقعہ ایسے وقت پیش آیا جب امریکا اور اسرائیل کی جانب سے ایران پر حملوں کا چوتھا روز تھا اور تہران ہمسایہ ممالک کو نشانہ بنا رہا ہے۔

یہ حملہ ایک دن بعد سامنے آیا جب قطر نے مائع قدرتی گیس کی پیداوار روک دی، جو عالمی رسد کا تقریباً پانچواں حصہ ہے، جبکہ سعودی عرب نے اپنی سب سے بڑی مقامی ریفائنری میں پیداوار معطل کر دی۔ اسرائیل کے بڑے گیس فیلڈز بھی بند رہے اور عراقی کردستان کے بیشتر پیداواری یونٹس معطل کر دیے گئے کیونکہ حالیہ دنوں میں ایران کی جانب سے توانائی تنصیبات، بندرگاہوں اور ہوائی اڈوں کو نشانہ بنانے کی اطلاعات ہیں۔

عمان ایران کے جوہری پروگرام پر امریکا اور تہران کے درمیان مذاکرات میں ثالث کا کردار ادا کر رہا تھا۔ حکام کے مطابق دقم میں ہونے والے نقصان پر قابو پا لیا گیا اور کوئی جانی نقصان نہیں ہوا۔ اتوار کو بھی دو ڈرون حملوں میں ایک کارکن زخمی ہوا تھا۔

ادھر ابوظہبی کے مصفحہ فیول ٹرمینل پر بھی ڈرون حملے کے بعد آگ بھڑک اٹھی، تاہم آپریشن متاثر نہیں ہوئے۔ وہاں سے ایندھن ٹرکوں اور طویل پائپ لائن نیٹ ورک کے ذریعے منتقل کیا جاتا ہے۔