ڈالر کے مقابلے روپے کی قدر مزید بہتر

انٹربینک مارکیٹ میں ڈالر کے مقابلے میں روپے کی قدر میں اضافے کا سلسلہ جاری ہے۔

پیر کو کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 279.46 روپے پر بند ہوا۔

یاد رہے کہ گزشتہ ہفتے مقامی کرنسی 279.47 پر بند ہوئی تھی۔

عالمی سطح پر پیر کو یورو کی قدر میں کمی آئی، سوئس فرانک مہنگا ہوا اور ڈالر کی قیمت میں تیزی سے اضافہ دیکھا گیا۔ یہ صورتحال اس وقت پیدا ہوئی جب امریکہ اور اسرائیل کی جانب سے ایران پر بمباری اور سپریم لیڈر آیت اللہ علی خامنہ ای کی شہادت کے بعد سرمایہ کاروں نے محفوظ پناہ گاہوں کا رخ کیا۔ اس واقعے نے مشرقِ وسطیٰ میں ایک طویل جنگ کے خطرات کو بڑھا دیا ہے۔

ایشیائی منڈیوں کے آغاز میں سوئس فرانک ڈالر کے مقابلے میں 0.4 فیصد اضافے کے ساتھ 0.7661 پر پہنچ گیا جبکہ یورو کے مقابلے میں 0.6 فیصد اضافے کے ساتھ 0.9030 کی سطح پر آگیا جو کہ 2015 کے بعد اس کی بلند ترین سطح ہے،تاہم بعد میں اس اضافے میں کچھ کمی دیکھی گئی۔

دوسری جانب اسرائیلی فوج نے دعویٰ کیا کہ اس کی فضائیہ نے خامنہ ای کو شہید کردیا ہے جس کی تصدیق ایرانی سرکاری میڈیا نے بھی کردی ہے۔ اس واقعے نے ایران میں جانشینی کی ایک انتہائی حساس اور پُرخطر دوڑ کا آغاز کر دیا ہے۔