ایران کے حملوں سے سرمایہ کاروں کا اعتماد متاثر، قطر کی اسٹاک مارکیٹ میں شدید مندی

خلیجی خطے میں ایران کے جوابی میزائل اور ڈرون حملوں کے بعد معاشی بے یقینی بڑھنے لگی ہے اور اس کے اثرات مالیاتی مارکیٹوں پر بھی نمایاں ہو گئے ہیں۔ پیر کے روز قطر کی اسٹاک مارکیٹ میں کاروبار کے آغاز پر شدید مندی دیکھی گئی، جبکہ متحدہ عرب امارات نے اپنی اسٹاک ایکسچینجز کو دو دن کے لیے بند رکھنے کا اعلان کر دیا۔

اتوار کو اسرائیل کی جانب سے تہران پر تازہ حملوں کے بعد ایران نے بھی نئے میزائل حملے کیے۔ ایرانی سپریم لیڈر آیت اللہ علی خامنہ ای کی شھادت کے ایک دن بعد مشرق وسطیٰ کی صورتحال مزید کشیدہ ہو گئی ہے، جس سے عالمی معیشت میں بھی بے یقینی بڑھ گئی ہے۔

یو اے ای کی کیپیٹل مارکیٹس اتھارٹی نے اعلان کیا کہ ابوظہبی سیکیورٹیز ایکسچینج اور دبئی فنانشل مارکیٹ 2 اور 3 مارچ کو بند رہیں گی۔ اتھارٹی کے مطابق یہ فیصلہ ملک کی سرمایہ منڈیوں پر اپنے نگران اور ضابطہ جاتی کردار کے تحت کیا گیا ہے۔

قطر میں بینچ مارک انڈیکس، جو اتوار کو بینک تعطیل کے باعث بند تھا، پیر کو کھلتے ہی 3.3 فیصد گر گیا اور تمام حصص منفی زون میں چلے گئے۔ قطر نیشنل بینک کے حصص میں 3.7 فیصد کمی ہوئی، جبکہ قطر اسلامک بینک کے شیئرز 5.2 فیصد گر گئے، جو اگست 2023 کے بعد سب سے بڑی کمی ہے۔ ایچ ایس بی سی نے بھی قطر اسلامک بینک کے لیے ہدف قیمت کم کر دی ہے۔