مالی سال 2026 کی پہلی ششماہی، حبکو کے منافع میں ایک فیصد کی گراوٹ

کم آمدنی کے باعث پاکستان کے سب سے بڑے آزاد پاور پروڈیوسر (آئی پی پی ) حب پاور کمپنی لمیٹڈ (حبکو) کے منافع میں تقریباً 1 فیصد کی کمی دیکھی گئی جو 31 دسمبر 2025 کو ختم ہونے والے مالی سال 2025-26 کی پہلی ششماہی کے دوران 25.62 ارب روپے رہا۔

اسٹاک ایکسچینج کو منگل کو بھیجے گئے نوٹس کے مطابق مجموعی بنیادوں پر کمپنی نے گزشتہ برس کی اسی مدت کے دوران 25.78 ارب روپے کا منافع ریکارڈ کیا تھا۔

نتیجتاً زیرِ جائزہ مدت کے دوران کمپنی کی فی شیئر آمدنی کم ہوکر 17.16 روپے رہ گئی جو کہ گزشتہ سال کی اسی مدت میں 17.99 روپے تھی۔

کمپنی نے 31 دسمبر 2025 کو ختم ہونے والی ششماہی کے لیے 5 روپے فی شیئر (یعنی 50 فیصد) عبوری نقدی منافع کا اعلان کیا ہے۔ یہ اس عبوری منافع کے علاوہ ہے جو پہلے ہی 5 روپے فی شیئر کے حساب سے ادا کیا جا چکا ہے۔

مجموعی بنیادوں پر صارفین کے ساتھ معاہدوں سے حاصل ہونے والی کمپنی کی آمدنی مالی سال 2026 کی پہلی ششماہی میں 28 فیصد کمی کے ساتھ 34.12 ارب روپے رہی، جبکہ گزشتہ سال یہ 47.53 ارب روپے ریکارڈ کی گئی تھی۔

کمپنی کی آمدنی کے حصول پر آنے والی لاگت مالی سال 2026 کی پہلی ششماہی میں 17 فیصد سے زائد کی کمی کے ساتھ 19.1 ارب روپے رہی جب کہ گزشتہ سال کی اسی مدت میں یہ 23.1 ارب روپے تھی۔

نتیجتاً حبکو کا مجموعی منافع مالی سال 2026 کی پہلی ششماہی میں تقریباً 39 فیصد کمی کے ساتھ 15.01 ارب روپے رہ گیا۔ یہ مالی سال 26 کی پہلی ششماہی میں 44 فیصد کے پرافٹ مارجن کو ظاہر کرتا ہے جبکہ گزشتہ سال کی اسی مدت میں یہ 51.4 فیصد تھا۔

اسی دوران کمپنی کی دیگر آمدنی میں 13 فیصد سے زائد کا نمایاں اضافہ ہوا جو مالی سال 2026 کی پہلی ششماہی میں 2.7 ارب روپے تک پہنچ گئی جب کہ گزشتہ سال کی اسی مدت میں یہ 2.3 ارب روپے تھی۔

بجلی پیدا کرنے والے اس ادارے کا آپریٹنگ منافع مالی سال 2026 کی پہلی ششماہی میں 16.2 ارب روپے رہا، جس میں 27 فیصد کی کمی دیکھی گئی۔

حبکو کے مالیاتی اخراجات کم ہو کر 4.8 ارب روپے رہ گئے، جو کہ تقریباً 50 فیصد کی بڑی کمی کو ظاہر کرتے ہیں۔

دوسری جانب حبکو نے مالی سال 2026 کی پہلی ششماہی کے دوران اپنی وابستہ کمپنیوں اور مشترکہ منصوبوں سے حاصل ہونے والے منافع کے حصے کے طور پر 21.3 ارب روپے کمائے جس میں 6 فیصد کا معمولی اضافہ ہوا۔

ٹیکس کی ادائیگی سے قبل کمپنی کا منافع 32.67 ارب روپے رہا، جس میں 1 فیصد کی کمی ریکارڈ کی گئی۔

ادارے نے مالی سال 2026 کی پہلی ششماہی میں 7.04 ارب روپے کے ٹیکس ادا کیے جو کہ گزشتہ سال کے مقابلے میں 10 فیصد زیادہ ہیں۔