ڈالر کے مقابلے میں روپے کی قدر میں معمولی اضافہ

انٹربینک مارکیٹ میں پیر کو ڈالر کے مقابلے روپے کی قدر میں معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 279.55 پر بند ہوا۔

یاد رہے کہ جمعہ کو مقامی کرنسی 279.56 پر بند ہوئی تھی۔

دوسری جانب پیر کوعالمی سطح پر ڈالر کی قدر میں کمی دیکھی گئی کیونکہ تاجروں نے امریکی سپریم کورٹ کے اس فیصلے کو عالمی معاشی ترقی کے لیے مثبت قرار دیا جس میں صدر ڈونلڈ ٹرمپ کے زیادہ تر ٹیرف (درآمدی ڈیوٹیوں) کو کالعدم قرار دے دیا گیا تھا۔ تاہم مشرقِ وسطیٰ میں الجھن اور تنازع کے خطرات کے باعث مارکیٹ میں ہلچل نسبتاً کم رہی۔ ایشیائی تجارت کے آغاز پر یورو 0.4 فیصد اضافے کے ساتھ 1.1823 ڈالر، جبکہ برطانوی پاؤنڈ بھی تقریباً اتنے ہی اضافے کے ساتھ 1.3521 ڈالر پر پہنچ گیا۔

جاپان میں تعطیل اور چین میں نئے قمری سال کی چھٹیوں کے باعث ایشیائی مارکیٹ میں حجم کم رہا، جہاں ڈالر 0.4 فیصد کمی کے بعد 154.42 ین کی سطح پر آگیا۔

سپریم کورٹ نے جمعہ کو اپنے فیصلے میں کہا تھا کہ ٹرمپ کے وسیع پیمانے پر عائد کردہ ٹیرف ان کے اختیارات سے تجاوز تھے۔ اس پر ردعمل دیتے ہوئے صدر ٹرمپ نے عدالت کو کڑی تنقید کا نشانہ بنایا اور درآمدات پر 15 فیصد بلینکٹ لیوی(ہمہ گیر ٹیکس) عائد کر دی، ساتھ ہی انہوں نے تجارتی شراکت داروں کے ساتھ زیادہ ٹیرف والے معاہدوں کو برقرار رکھنے پر بھی اصرار کیا۔

مزید برآں عالمی مارکیٹ میں خام تیل کی قیمتوں میں پیر کو تقریباً 1 فیصد کمی ہوئی۔اس کی وجہ امریکہ اور ایران کے درمیان جوہری مذاکرات کے تیسرے دور کی تیاریاں تھیں جس سے تنازع بڑھنے کے خدشات کم ہوئے، جبکہ دوسری طرف صدر ٹرمپ کے نئے ٹیرف نے عالمی معاشی ترقی اور ایندھن کی طلب کے حوالے سے غیر یقینی صورتحال پیدا کر دی۔ برینٹ کروڈ کے سودے 76 سینٹ (1.06 فیصد) کمی کے ساتھ 71 ڈالر فی بیرل جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کے سودے 75 سینٹ (1.10 فیصد) کمی کے بعد 65.75 ڈالر فی بیرل پر آگئے۔