ڈالر کے مقابلے میں روپیہ مزید مضبوط

انٹربینک مارکیٹ میں پیر کو ڈالر کے مقابلے روپے کی قدر میں اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 279.61 روپے پر بند ہوا۔

یاد رہے کہ مقامی کرنسی جمعہ کو 279.62 روپے پر بند ہوئی تھی۔

بین الاقوامی سطح پر مالیاتی خدشات میں کمی کے باعث گزشتہ ہفتے شاندار اضافے کے بعد جاپانی ین نے ہفتے کا آغاز کمزوری کے ساتھ کیا جبکہ امریکی ڈالر مستحکم رہا کیونکہ مہنگائی کے نرم اعدادوشمار نے رواں سال کے آخر میں فیڈرل ریزرو کی جانب سے شرحِ سود میں کٹوتی کے امکانات کو مزید تقویت دی ہے۔

امریکہ، چین، تائیوان اور جنوبی کوریا میں تعطیل کی وجہ سے مارکیٹوں میں لین دین کم رہنے کا امکان ہے۔

گزشتہ ہفتے تقریباً 3 فیصد کی بڑی چھلانگ لگانے کے بعد جو کہ وزیراعظم ثنائے تاکائچی کی شاندار انتخابی کامیابی کے نتیجے میں تقریباً 15 ماہ کا سب سے بڑا ہفتہ وار اضافہ تھا پیر کو ابتدائی تجارت کے دوران ین کی قدر میں 0.2 فیصد کمی آئی اور یہ 153.07 فی امریکی ڈالر پر آگیا۔

اسی دوران امریکی ڈالر ہفتہ وار خسارے کی جانب گامزن رہا جس کی وجہ مختلف عوامل کا مجموعہ ہے جن میں دیگر کرنسیوں کی مضبوطی کے ساتھ امریکی معیشت کے استحکام کے حوالے سے پائے جانے والے بعض شکوک و شبہات شامل ہیں۔

مختلف کرنسیوں کے ایک مجموعے (باسکٹ) کے مقابلے میں گرین بیک (ڈالر) کی قدر 96.93 پر تقریباً مستحکم رہی تاہم ہفتہ وار بنیادوں پر اس میں 0.8 فیصد کے قریب کمی متوقع ہے۔

گزشتہ رات سامنے آنے والے اعدادوشمار ظاہر کرتے ہیں کہ گزشتہ ہفتے بے روزگاری کے فوائد کے لیے نئی درخواستیں جمع کرانے والے امریکیوں کی تعداد میں توقع سے کم کمی واقع ہوئی ہے۔