فیلڈ مارشل سید عاصم منیر کی میونخ کانفرنس میں امریکی وزیر خارجہ سے ملاقات

چیف آف ڈیفنس فورسز(سی ڈی ایف) فیلڈ مارشل سید عاصم منیر نے 12 سے 14 فروری تک منعقدہ 62 ویں میونخ سیکیورٹی کانفرنس کے موقع پرامریکی وزیر خارجہ مارکو روبیو، اعلیٰ جرمن حکام اور برازیل و لبنان کے دفاعی رہنماؤں سے اہم ملاقاتیں کیں۔

آئی ایس پی آر کے مطابق امریکی وزیر خارجہ سے ملاقات کے دوران باہمی دلچسپی کے امور بشمول بدلتی ہوئی عالمی و علاقائی سیکیورٹی صورتحال اور دہشت گردی کے خلاف تعاون پر تبادلہ خیال کیا گیا۔

جرمن حکام کے ساتھ الگ الگ ملاقاتوں میں فیلڈ مارشل نے وفاقی وزیر داخلہ الیگزینڈر ڈوبرنڈٹ، وفاقی چانسلر کے مشیر برائے خارجہ و سیکیورٹی پالیسی گنٹر ساؤٹر اور جرمن مسلح افواج کے سربراہ جنرل کارسٹن بریور سے گفتگو کی۔ ان مذاکرات کا مرکز عصرِ حاضر کے سیکیورٹی چیلنجز، دوطرفہ دفاعی تعاون اور مسلسل مذاکرات کے ذریعے عالمی امن کو مستحکم کرنے کی اہمیت تھی۔

علاوہ ازیں فیلڈ مارشل عاصم منیر نے برازیلی مسلح افواج کے جوائنٹ اسٹاف کے سربراہ ایڈمرل ریناٹو روڈریگز ڈی اگیار فریئرا سے عسکری تعاون بڑھانے پر بات چیت کی۔

لبنانی مسلح افواج کے کمانڈر جنرل روڈولف ہیکل نے بھی ان سے ملاقات کی، جس میں علاقائی سلامتی اور دفاعی تعلقات کو وسعت دینے پر غور کیا گیا۔ یہ ملاقاتیں مشترکہ سیکیورٹی ترجیحات پر اہم بین الاقوامی شراکت داروں کے ساتھ پاکستان کے مسلسل سفارتی اور عسکری رابطوں کی عکاسی کرتی ہیں۔