رمضان 2026 : سپارکو کی 19 فروری کو پہلے روزے کی پیش گوئی

پاکستان اسپیس اینڈ اپر ایٹموسفیئر ریسرچ کمیشن (سپارکو) نے پیش گوئی کی ہے کہ پہلا روزہ 19 فروری کو ہونے کا امکان ہے کیونکہ 18 فروری کو چاند نظر آنے کی توقع ہے۔ خلائی ادارے نے جمعہ کو بتایا کہ رمضان المبارک 1447 ہجری کے نئے چاند کی پیدائش 17 فروری کو پاکستانی وقت کے مطابق شام 5 بج کر 1 منٹ پر ہوگی۔ ٍ

فلکیاتی حسابات کی بنیاد پر 18 فروری 2026 کو غروبِ آفتاب کے وقت چاند کی عمر تقریباً 25 گھنٹے 48 منٹ ہوگی۔ ساحلی علاقوں میں غروبِ آفتاب اور غروبِ قمر کے درمیان وقفہ تقریباً 59 منٹ متوقع ہے، جس سے چاند کی رویت کے امکانات بہتر ہو جائیں گے۔

سپارکو کے مطابق دستیاب سائنسی ڈیٹا کی روشنی میں اس بات کا قوی امکان ہے کہ 18 فروری کی شام کو نیا چاند انسانی آنکھ سے دیکھا جا سکے گا، جس کے نتیجے میں رمضان کا پہلا دن غالباً 19 فروری 2026 کو ہوگا، تاہم اسلامی مہینے کے آغاز کا حتمی اعلان رویتِ ہلال کمیٹی پاکستان کرے گی، جو ملک بھر سے موصول ہونے والی تصدیق شدہ شہادتوں کی بنیاد پر فیصلہ کرنے کی مجاز ہے۔

یہ پیش گوئی محکمہ موسمیات پاکستان (پی ایم ڈی) کے اعداد و شمار کے بھی عین مطابق ہے۔

محکمہ موسمیات کا کہنا ہے کہ فلکیاتی پیرامیٹرز کے تحت 18 فروری (29 شعبان) کی شام کو چاند نظر آنے کے بہتر امکانات موجود ہیں اور اس روز ملک کے بیشتر حصوں میں مطلع صاف یا جزوی طور پر ابر آلود رہنے کی توقع ہے۔