درجہ حرارت 10 ڈگری سینٹی گریڈ سے گرنے کے پیشِ نظر کراچی سرد اختتامِ ہفتہ کے لیے تیار

محکمہ موسمیات پاکستان ( پی ایم ڈی) نے ہفتے کو پیش گوئی کرتے ہوئے کہا ہے کہ کراچی میں درجہ حرارت پیر تک 10 ڈگری سے نیچے گر سکتا ہے۔

ماہر موسمیات انجم نذیر ضیغم کے مطابق جمعرات کو دوبارہ بارش کے بعد شہر جنوری کے آخر تک سرد اور خشک رہنے کے ساتھ وقفے وقفے سے ہواؤں کا سامنا کر سکتا ہے۔

محکمہ موسمیات کے مطابق ہفتے کو کم سے کم درجہ حرارت 8.5 ڈگری سینٹری گریڈ رہنے کا امکان ہے جبکہ اتوار کو یہ مزید گر کر 7 سے 9 ڈگری سینٹی گریڈ کے درمیان رہنے کی توقع ہے۔ پیر کی رات تک درجہ حرارت میں معمولی اضافہ ہو کر 8 سے 10 ڈگری سینٹی گریڈ کے درمیان متوقع ہے۔

دن کے اوقات میں درجہ حرارت نسبتاً کم رہنے کی پیش گوئی ہے، جو اتوار تک 19 سے 21 ڈگری سینٹی گریڈ کے درمیان اور پیر کو 20 سے 22 ڈگری سینٹی گریڈ کے درمیان رہنے کی توقع ہے۔

موجودہ سرد لہر اس مغربی ہوائی لہر کے بعد آئی ہے جو رواں ہفتے کے شروع میں شہر میں ہلکی اور کہیں درمیانی بارش اور تیز ہوائیں لائے، جس سے ہوا کے ساتھ محسوس ہونے والے درجہ حرارت میں نمایاں کمی ہوئی۔

محکمہ موسمیات نے جمعہ کے روز کہا ہے کہ اتوار کی رات سے منگل تک ملک کے مختلف حصوں میں مزید بارش اور برف باری کا امکان ہے، کیونکہ 25 جنوری کو ایک مغربی ہوائی لہر ملک کے مغربی حصوں کی طرف آنے کا امکان ہے۔ محکمہ موسمیات کے مطابق نیا موسمی نظام 26 جنوری کو ملک کے بالائی علاقوں پر اثر ڈالنے کا امکان رکھتا ہے۔