’بورڈ آف پیس میں شمولیت: اپوزیشن کے احتجاج کے باوجود حکومت کا فیصلے کا دفاع

اپوزیشن کے شدید احتجاج اور ہنگاموں کے درمیان، حکومت نے امریکی صدر ڈونلڈ ٹرمپ کی قیادت میں قائم ہونے والے بورڈ آف پیس میں شامل ہونے کے اپنے فیصلے کا بھرپور دفاع کیا۔ حکومت نے اس اقدام کو پاکستان اور اس کے مسلم اتحادیوں کے لیے ایک بڑی سفارتی فتح قرار دیتے ہوئے اسے غزہ اور وسیع تر مسلم دنیا میں امن کی تلاش کی جانب ایک اہم قدم قرار دیا ہے۔

اسپیکر قومی اسمبلی ایاز صادق کی زیرِ صدارت پارلیمنٹ کے مشترکہ اجلاس سے خطاب کرتے ہوئے وفاقی وزیر منصوبہ بندی احسن اقبال نے امریکہ کی قیادت میں قائم بورڈ آف پیس میں شامل ہونے کے فیصلے کو ایک سفارتی کامیابی قرار دیا اور اپوزیشن بنچوں کی جانب سے بڑھتی تنقید کے باوجود اراکین پر زور دیا کہ وہ اس کا جشن منائیں۔

انہوں نے اس فیصلے کو دیگر مسلم ممالک کے ساتھ مل کر فلسطین میں امن کے قیام کے لیے پاکستان کے کلیدی کردار کی کوششوں کے حصے کے طور پر پیش کیا۔

اپنے خطاب میں احسن اقبال نے 1998 کے ایٹمی دھماکوں کی مثال دیتے ہوئے وہ وقت یاد دلایا جب ملک کو شدید عالمی دباؤ کا سامنا تھا اور پاکستان نے اپنی خودمختاری کے دفاع کے لیے ہمت کا مظاہرہ کیا تھا۔

انہوں نے دوٹوک انداز میں اعلان کیا کہ ہمیں پاکستان کے دفاع اور سالمیت کے بارے میں کسی سے سبق سیکھنے کی ضرورت نہیں ہے اور اس بات پر زور دیا کہ حکمران جماعت پاکستان مسلم لیگ (ن) کی قیادت میں پاکستان کی خودمختاری مکمل طور پر محفوظ ہے۔

انہوں نے یہ بھی نوٹ کیا کہ حکومت اور مسلح افواج نے 2025 کے پاک-بھارت تنازع کے دوران طاقت کا بھرپور مظاہرہ کیا تھا اور خبردار کیا کہ کسی بھی دشمن کو منہ توڑ جواب دیا جائے گا۔

فلسطین کے مسئلے پر بات کرتے ہوئے احسن اقبال نے فلسطینیوں کے مصائب کا اعتراف کیا لیکن اس بات پر اصرار کیا کہ امن کی اس کوشش میں شامل ہونا ہی درست راستہ تھا۔

انہوں نے کہا کہ اگر ہم بورڈ آف پیس میں شامل نہ ہوتے تو اپوزیشن ہمیں عالمی امن کی کوششوں سے پاکستان کے الگ تھلگ رہنے پر تنقید کا نشانہ بناتی۔

انہوں نے اس بات پر بھی زور دیا کہ اسرائیل کو جارح سمجھنے سے متعلق پاکستان کا موقف تبدیل نہیں ہوا اور دعویٰ کیا کہ امن عمل میں حکومت کی شمولیت فلسطینیوں کے حقوق کے لیے اس کی وابستگی پر مبنی ہے۔

احسن اقبال نے اسرائیل اور حماس کے درمیان ہونے والی جنگ بندی کی طرف بھی اشارہ کیا جو ان کے بقول 8 مسلم ممالک کی ٹرمپ انتظامیہ کے ساتھ مل کر کی جانے والی کوششوں کا جزوی نتیجہ تھی۔

انہوں نے مزید کہا کہ فلسطین کے عوام نے اس جنگ بندی کو قبول کیا اور اپنی زندگیوں کی از سرِ نو تعمیر شروع کی۔

تاہم اپوزیشن رہنماؤں نے حکومت کے موقف کی سخت مخالفت کی۔ سینیٹ میں اپوزیشن رہنما علامہ راجہ ناصر عباس نے کہا کہ جو کچھ نیتن یاہو حاصل کرنے میں ناکام رہے، وہ اب امن بورڈ کے پردے تلے کیا جارہا ہے۔

انہوں نے تشویش ظاہر کی کہ پاکستان نے قومی اتفاق رائے کے بغیر اور اراکین کو شرائط سے آگاہ کیے بغیر اس فورم میں شمولیت اختیار کی۔

انہوں نے کہا کہ یہ نام نہاد امن بورڈ صرف فلسطینی عوام کی مشکلات میں اضافہ کرے گا اور اسرائیل کے وزیراعظم نیتن یاہو پر الزام لگایا کہ وہ اس پلیٹ فارم کا استعمال اسرائیلی جارحیت کو بڑھانے کے لیے کررہے ہیں۔

جمیعت علمائے اسلام (ف) کے سربراہ مولانا فضل الرحمن نے بھی اس فیصلے کی سخت تنقید کی، انہوں نے الزام عائد کرتے ہوئے کہا کہ یہ ڈونلڈ ٹرمپ کے خوف سے متاثر ہے اور آخرکار مسلم ممالک کے خلاف اسرائیل کی پوزیشن کو مضبوط کرے گا۔

انہوں نے خبردار کیا کہ اسرائیل کا جارحانہ موقف جلد ہی حماس اور ایران کے معاملے کے بعد پاکستان کی طرف بھی منتقل ہوجائے گا۔

فضل الرحمن نے حکومت پر تنقید کی کہ اس نے اس اقدام میں شامل ہونے سے قبل پارلیمنٹ اور کابینہ سے مشاورت نہیں کی۔ انہوں نے خبردار کیا کہ امریکہ نے افغانستان، عراق اور لیبیا کو تباہ کیا اور اب اسرائیل اپنی توجہ پاکستان کی طرف مرکوز کرے گا۔

انہوں نے پاکستان کے اسرائیل جانے پر پاسپورٹ پابندیوں کے مسئلے کی جانب بھی توجہ دلائی اور سوال اٹھایا کہ حکومت ایسے ملک کے ساتھ کیوں تعلقات قائم کر رہی ہے جسے پاکستان باضابطہ طور پر تسلیم نہیں کرتا۔

کاپی رائٹ بزنس ریکارڈر 2026