ڈالر کے مقابلے روپیہ مزید تگڑا

انٹربینک مارکیٹ میں جمعرات کو ڈالر کے مقابلے روپے کی قدر میں 0.01 فیصد اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.87 روپے پر بند ہوا۔

یاد رہے کہ بدھ کو مقامی کرنسی 279.90 روپے پر بند ہوئی تھی۔

عالمی سطح پر امریکی ڈالر نے جمعرات کو دیگر بڑی کرنسیوں کے مقابلے میں گزشتہ رات ہونے والے اضافے کو برقرار رکھا۔ یہ استحکام صدر ڈونلڈ ٹرمپ کی جانب سے نیٹو کے متعدد یورپی ممالک پر ٹیرف لگانے کی دھمکی واپس لینے کے بعد سامنے آیا ہے، جس کے ساتھ ہی انہوں نے گرین لینڈ کے کنٹرول سے متعلق نیٹو کے ساتھ ایک معاہدے کے فریم ورک کا اعلان بھی کیا۔

اس کے نتیجے میں محفوظ کرنسی سوئس فرانک پیچھے ہٹ گیا اور تین ہفتوں کی بلند ترین سطح سے شدید کمی دیکھی گئی، جبکہ سونا اپنی بلند ترین قیمت سے گر گیا۔

دوسری جانب آسٹریلوی ڈالر 15 ماہ کی بلند ترین سطح پر پہنچ گیا۔

جاپانی وزیراعظم کی جانب سے رواں ہفتے اچانک انتخابات کرانے کے اعلان اور مالیاتی پالیسی میں نرمی کے اقدامات کے وعدے کے بعد، ین بدستور دباؤ کا شکار رہا اور یورو کے مقابلے میں اپنی ریکارڈ کم ترین سطح کے قریب رہا۔

جمعرات کو امریکی ڈالر، یورو کے مقابلے میں 1.1685 ڈالر پر مستحکم رہا، جبکہ گزشتہ سیشن میں اس کی قدر میں 0.3 فیصد اضافہ دیکھا گیا تھا۔ گزشتہ رات 0.7 فیصد کی بڑی چھلانگ لگانے کے بعد سوئس فرانک کے مقابلے میں ڈالر 0.7953 پر مستحکم رہا۔