ڈالر کے مقابلے روپے کی قدر میں مزید اضافہ

انٹربینک مارکیٹ میں پیر کو ڈالر کے مقابلے روپے کی قدر میں 0.01 فیصد اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.92 پر بند ہوا۔

یاد رہے کہ گزشتہ ہفتے ڈالر کے مقابلے میں روپیہ 7 پیسے کی بہتری سے 279.95 پر بند ہوا تھا۔

عالمی سطح پر پیر کو امریکی ڈالر کی قدر میں کمی دیکھی گئی۔ سرمایہ کار امریکی صدر ڈونلڈ ٹرمپ کی جانب سے گرین لینڈ کے معاملے پر یورپ کو ٹیرف (درآمدی ڈیوٹی) کی تازہ دھمکیوں کے باعث بے چینی کا شکار ہیں جس کی وجہ سے انہوں نے محفوظ سرمایہ کاری کے طور پر جاپانی ین اور سوئس فرانک کا رخ کر لیا ہے۔ مارکیٹ میں پائے جانے والے اس وسیع تر غیر یقینی رجحان نے ڈالر پر دباؤ بڑھا دیا ہے۔

صدر ٹرمپ نے ہفتے کے اختتام پر کہا کہ وہ یکم فروری سے ڈنمارک، ناروے، سویڈن، فرانس، جرمنی، نیدر لینڈز، فن لینڈ اور برطانیہ سے آنے والی اشیاء پر 10 فیصد اضافی درآمدی ٹیرف (ڈیوٹی) عائد کر دیں گے اور یہ پابندی تب تک برقرار رہے گی جب تک امریکہ کو گرین لینڈ خریدنے کی اجازت نہیں مل جاتی۔

یورپی یونین کی بڑی ریاستوں نے اتوار کو گرین لینڈ کے معاملے پر ٹیرف (درآمدی ڈیوٹی) کی دھمکیوں کو بلیک میلنگ قرار دے کر مسترد کردیا جبکہ فرانس نے اس کے جواب میں ایسے معاشی اقدامات کرنے کی تجویز دی ہے جن کا پہلے کبھی تجربہ نہیں کیا گیا۔

فاریکس مارکیٹ میں، ایشیا میں ابتدائی تجارتی سیشن کے دوران یورو اور پاؤنڈ کی فروخت کا فوری ردعمل سامنے آیا جس کے نتیجے میں یہ کرنسیاں بالترتیب سات ہفتے کی کم ترین اور ایک ماہ کی نچلی سطح پر پہنچ گئیں۔

تاہم، دونوں کرنسیاں اپنی کم ترین سطح سے بحال ہو گئیں اور دن کے آغاز کے ساتھ امریکی ڈالر پر دباؤ بڑھا، کیونکہ سرمایہ کار صدر ٹرمپ کے تازہ اقدامات کے ڈالر پر طویل مدتی اثرات کا جائزہ لے رہے تھے۔

ڈالر انڈیکس معمولی کمی کے ساتھ 99.18 پر آگیا۔

تیل کی قیمتیں، جو کرنسی شرح مبادلہ کا اہم اشارہ ہیں، پیر کے روز 1 فیصد گر گئیں اورپچھلے سیشن میں ہونے والے اضافے کو زائل کر دیا، کیونکہ ایران میں شہری بے چینی کم ہونے سے امریکی حملے کا امکان کم ہو گیا جو مشرق وسطیٰ کے بڑے تیل پیدا کرنے والے ملک سے رسد کو متاثر کر سکتا تھا۔

برینٹ کروڈ عالمی معیاری وقت کے مطابق صبح 9 بج کر 12 منٹ پر فی بیرل 63.48 ڈالر پر ٹریڈ ہو رہا تھا، جو 65 سینٹ یا 1 فیصد کم ہے۔

امریکی ویسٹ ٹیکساس انٹرمیڈیٹ فروری کے لیے 65 سینٹ یا تقریباً 1 فیصد کی کمی کے ساتھ 58.84 ڈالر فی بیرل پر پہنچ گیا۔ یہ کنٹریکٹ منگل کو ختم ہو رہا ہے اور زیادہ فعال مارچ کا کنٹریکٹ 58.77 ڈالر پر تھا، جو 57 سینٹ یا 1 فیصد نیچے ہے۔