کراچی میں سڑکوں کی بحالی کے لیے 5.54 ارب روپے کے بڑے منصوبے کا آغاز

کراچی میٹروپولیٹن کارپوریشن (کےایم سی) نے شہر بھر میں سڑکوں کی بحالی کے جامع پروگرام کا آغاز کر دیا ہے جس پر تقریباً 5.54 ارب روپے لاگت کا تخمینہ لگایا گیا ہے۔ اس منصوبے کا مقصد شہر میں نقل و حمل کی سہولیات کو بہتر بنانا اور شہری انفرااسٹرکچر کو جدید اور پائیدار بنانا ہے۔

کے ایم سی کے اعلامیے کے مطابق سندھ حکومت کے وژن کے تحت شہریوں کو محفوظ اور ہموار سفری سہولیات کی فراہمی کے لیے 26 اندرونی سڑکوں کی بحالی کا آغاز کیا گیا ہے، جن کی کل لمبائی 68 کلومیٹر ہے۔

ادارے نے پریس ریلیز میں مزید بتایا کہ یہ سڑکیں رہائشی و تجارتی علاقوں اور کراچی کی بڑی شاہراہوں کے درمیان اہم رابطے کا کام کرتی ہیں اور روزانہ بڑی تعداد میں مسافر انہیں استعمال کرتے ہیں۔

میئر کراچی بیرسٹر مرتضیٰ وہاب کی ہدایات پر منصوبے کی بروقت تکمیل کو یقینی بنانے کے لیے اس پر کام تیز کر دیا گیا ہے۔ ان ہدایات کے بعد ٹینڈرز جاری کر دیے گئے ہیں اور پیش رفت کو تیز کرنے اور عوام کی پریشانی کم کرنے کے لیے ترجیحی بنیادوں پر عملدرآمد کا عمل شروع کر دیا گیا ہے۔

منتخب کی گئی سڑکیں کراچی کے مختلف اضلاع اور ٹاؤنز میں پھیلی ہوئی ہیں جن میں اولمپین اصلاح الدین روڈ، نقاش کاظمی روڈ، سردار علی صبری روڈ، سبطِ اختر روڈ، یو پی موڑ روڈ، پیر بازار روڈ، الامنہ روڈ، رحیمینہ روڈ، نارتھ ناظم آباد کے متعدد بلاکس، سخی حسن اسٹریٹ، 19-ڈی روڈ، روڈ نمبر 04 اور 05، بدر چوک روڈ، زیڈ ایم سی روڈ، فقیر کالونی براستہ مومن آباد، میشم لی روڈ، مشن روڈ، چاند بی بی روڈ، جناح اسکوائر، لیاقت مارکیٹ، کھوکھرا پار دال خانہ روڈ، لیاقت روڈ، مہران ڈپو روڈ اور ہاشم رضا روڈ شامل ہیں۔ ان سڑکوں کی بحالی کی کل لاگت 5,530 ملین (5.53 ارب) روپے بنتی ہے۔

ان سڑکوں کا انتخاب ٹریفک کے دباؤ، عوامی استعمال اور روزمرہ کی آمد و رفت اور معاشی سرگرمیوں میں ان کی اہمیت کو مدنظر رکھتے ہوئے احتیاط سے کیا گیا ہے۔ بحالی کے کام سے سڑکوں کی سطح بہتر ہوگی، ان کی پائیداری بڑھے گی اور ٹریفک کی روانی اور سڑکوں کی حفاظت میں بہتری آئے گی۔

میئر کراچی نے اس بات کا اعادہ کیا کہ ان کی قیادت شہر بھر میں واضح بہتری لانے پر توجہ مرکوز کیے ہوئے ہے۔ انہوں نے کہا کہ “ہمارا مشن پائیدار ترقی اور موثر طرزِ حکمرانی کے ذریعے کراچی کو بدلنا ہے۔ سڑکوں کی بحالی کے یہ منصوبے کراچی کو ایک متحرک، مربوط اور رہنے کے قابل شہر کے طور پر بحال کرنے کی جانب ایک قدم ہیں جو کہ صحیح معنوں میں روشنیوں کا شہر ہے ۔