پاکستان اور انڈونیشیا کے درمیان دفاعی تعاون کو وسعت دینے پر تبادلۂ خیال

انڈونیشیا کے وزیرِ دفاع لیفٹیننٹ جنرل (ر) سجافری سجمسوڈن نے پیر کے روز جنرل ہیڈکوارٹرز (جی ایچ کیو) میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سے ملاقات کی، جہاں دونوں فریقوں نے دوطرفہ دفاعی تعاون کو مضبوط بنانے کے طریقوں پر تبادلۂ خیال کیا ۔ یہ بات پاکستان فوج کے شعبۂ تعلقاتِ عامہ نے ایک رپورٹ میں بتائی ہے۔

انٹر سروسز پبلک ریلیشنز (آئی ایس پی آر) کے مطابق ملاقات میں باہمی دلچسپی کے امور، بدلتی ہوئی علاقائی اور عالمی سلامتی کی صورتحال، اور پاکستان و انڈونیشیا کے درمیان دفاعی تعاون کو فروغ دینے کے امکانات زیرِ بحث آئے۔

گفتگو کے دوران ادارہ جاتی روابط کو مضبوط بنانے، تربیتی تعاون میں توسیع اور دفاعی صنعتی شراکت داری کے فروغ پر خصوصی زور دیا گیا۔

انڈونیشیا کے وزیرِ دفاع نے پاکستانی مسلح افواج کی پیشہ ورانہ صلاحیتوں کو سراہا اور دہشت گردی کے خلاف جنگ میں ان کی قربانیوں کا اعتراف کیا۔ انہوں نے متعدد شعبوں میں پاکستان کے ساتھ دفاعی تعلقات کو مزید وسعت دینے کی انڈونیشیا کی خواہش کا بھی اظہار کیا۔

بیان کے مطابق فیلڈ مارشل عاصم منیر نے مشترکہ اقدار، باہمی احترام اور اسٹریٹجک مفادات کے اشتراک کی بنیاد پر انڈونیشیا کے ساتھ مضبوط اور پائیدار دفاعی تعلقات کے قیام کے لیے پاکستان کے عزم کا اعادہ کیا۔

ایک علیحدہ پیش رفت میں انڈونیشیا کے وزیرِ دفاع کی قیادت میں ایک دفاعی وفد نے ایئر ہیڈکوارٹرز اسلام آباد میں چیف آف ایئر اسٹاف، ایئر چیف مارشل ظہیر احمد بابر سدھو، ہلال جرات، نشان امتیاز(ملٹری)، سے ملاقات کی ہے۔

یہ ملاقات انڈونیشیا کے صدر کے حالیہ سرکاری دورۂ پاکستان کے بعد عمل میں آئی۔

ملاقات میں پاکستان اور انڈونیشیا کے تاریخی اور برادرانہ تعلقات کا اعادہ کیا گیا اور دوطرفہ فضائی افواج کے تعاون کو مضبوط بنانے پر توجہ مرکوز رہی، بالخصوص صلاحیت سازی، تربیت اور تکنیکی اشتراک کے شعبوں میں۔

ایئر چیف نے وفد کو پاک فضائیہ کے جاری جدیدکاری منصوبے پر بریفنگ دی، جس میں انفراسٹرکچر کی ترقی، تربیتی نظام میں اصلاحات، اور کثیرالجہتی آپریشنز کے لیے تیاری بڑھانے کے مقصد سے مخصوص صلاحیتوں کی شمولیت شامل ہے۔

انڈونیشیا کے وزیرِ دفاع نے پاک فضائیہ کی پیشہ ورانہ صلاحیتوں، جنگی تیاری اور نیشنل ایرو اسپیس سائنس اینڈ ٹیکنالوجی پارک کے تحت مقامی سطح پر حاصل کی گئی کامیابیوں کو سراہا، اور تربیت، ہوابازی اور ایرو اسپیس کے شعبوں میں تعاون بڑھانے میں گہری دلچسپی کا اظہار کیا۔

ملاقات سے پاکستان اور انڈونیشیا کے درمیان دفاعی تعلقات میں بڑھتی ہوئی رفتار اور مسلسل رابطے اور مکالمے کے ذریعے تعاون کو مزید گہرا کرنے کے مشترکہ عزم کی عکاسی ہوتی ہے۔