نجکاری کمیشن کے ایچ بی ایف سی ایل، روزویلٹ ہوٹل اور اسلام آباد ایئرپورٹ کے حوالے سے اہم فیصلے

نجکاری کمیشن ( پی سی ) کے 247 ویں اجلاس میں چند انتہائی کلیدی معاہدوں کے حوالے سے اہم فیصلے کیے گئے ہیں جن میں ہاؤس بلڈنگ فنانس کمپنی لمیٹڈ ( ایچ بی ایف سی ایل )، نیو یارک کے روزویلٹ ہوٹل، اسلام آباد انٹرنیشنل ائیرپورٹ (آئی ائی اے پی ) اور پاور ڈسٹری بیوشن کمپنیوں ( ڈسکوز) کا دوسرا بیچ شامل ہے۔

بورڈ نے ایچ بی ایف سی ایل میں 51 فیصد حصص کی جاری مذاکراتی فروخت ختم کرنے کی سفارش کی، کیونکہ پاکستان مورگیج ری فنانس کمپنی لمیٹڈ ( پی ایم آر سی ایل ) واحد بولی دہندہ کے طور پر سامنے آئی، جس نے 4.2 ارب روپے کی بولی دی، جو کابینہ کمیٹی برائے نجکاری ( سی سی او پی) کے منظور شدہ 13.55 ارب روپے کے ریفرنس پرائس سے کافی کم تھی۔

بورڈ نے نئے مالیاتی مشیر کی تعیناتی کے ساتھ نجکاری کے عمل کو دوبارہ شروع کرنے کا مشورہ دیا۔

روزویلٹ ہوٹل کے حوالے سے بورڈ نے مالیاتی مشیر کی خدمات حاصل کرنے کے عمل کو منسوخ کیا اور نئے اظہار دلچسپی کے لیے ہدایات جاری کیں تاکہ مسابقتی عمل یقینی بنایا جا سکے، کیونکہ قانونی اور تکنیکی جانچ کے بعد دلچسپی رکھنے والے فریقین کی تعداد سات سے دو رہ گئی تھی۔

بورڈ نے اسلام آباد انٹرنیشنل ائیرپورٹ کو نجکاری پروگرام میں شامل کرنے کی سفارش کی اور کھلے مسابقتی عمل کے تحت کنسیشن پر مبنی ماڈل کی تجویز پیش کی۔

مزید برآں حیدرآباد الیکٹرک سپلائی کمپنی ( حیسکو ) اور سکھر الیکٹرک پاور کمپنی ( سیپکو ) کی نجکاری کے لیے ٹرانزیکشن کمیٹی کے قیام کی منظوری دی گئی، جو رائفی سین انویسٹمنٹ کے ذریعے جمع کرائی گئی دستاویزات کا جائزہ لے گی۔

بورڈ نے شفافیت کے عزم کو دہرایا اور کہا کہ تمام ٹرانزیکشنز کو منظم اور شفاف مسابقتی عمل کے ذریعے انجام دیا جائے گا تاکہ قومی خزانے کے لیے زیادہ سے زیادہ فائدہ حاصل کیا جا سکے۔