برف باری اور اوس سے نیدرلینڈز میں ٹرینوں کی آمد و رفت معطل

نیدرلینڈز میں منگل کو بھی برف باری اوراوس کے باعث ٹریفک کا نظام درہم برہم رہا، جس کی وجہ سے تمام ٹرینیں رک گئیں اور سینکڑوں پروازیں منسوخ کرنی پڑیں۔

ڈچ ریلوے کمپنی این ایس نے بتایا کہ برف باری اور نقطہ انجماد سے گرے ہوئے درجہ حرارت کے باعث پیدا ہونے والی مشکلات کی وجہ سے کم از کم صبح 9 بجے تک کوئی ٹرین نہیں چل سکے گی۔

ایمسٹرڈیم کے اسخیپول ایئرپورٹ پر ایئر لائن کے ایل ایم نے منگل کے لیے کم از کم 300 پروازیں منسوخ کر دی ہیں۔ موسمِ سرما کی اس شدت نے مسلسل پانچویں روز یورپ کے اس اہم ترین ٹرانزٹ حب میں ٹریفک کے نظام کو مفلوج کر کے رکھ دیا ہے۔