پاکستان کی اسرائیل کی جانب سے ’نام نہاد صومالی لینڈ خطے‘ کو تسلیم کرنے کی مذمت

پاکستان نے ہفتے کے روز وفاقی جمہوریہ صومالیہ کے ”نام نہاد صومالی لینڈ کے علاقے“ کو تسلیم کرنے کے اسرائیل کے اعلان کی مذمت کرتے ہوئے کہا کہ یہ ”صومالیہ کی خودمختاری، اتحاد اور علاقائی سالمیت“ کو نقصان پہنچانے کی کوشش ہے۔

اسرائیل نے جمعے کے روز صومالی لینڈ کو باضابطہ طور پر ایک ”آزاد اور خودمختار ریاست“ کے طور پر تسلیم کیا اور سفارتی تعلقات قائم کرنے کے معاہدے پر دستخط کیے ہیں۔

دفتر خارجہ نے ایک بیان میں کہا ہے کہ پاکستان صومالیہ کی خودمختاری، اتحاد اور علاقائی سالمیت کو نقصان پہنچانے کی کسی بھی کوشش کی شدید مذمت کرتا ہے اور اس سلسلے میں اسرائیل کی جانب سے وفاقی جمہوریہ صومالیہ کے نام نہاد صومالی لینڈ خطے کی آزادی کو تسلیم کرنے کے اعلان کو مسترد کرتا ہے۔

”اس طرح کے غیر قانونی اور اشتعال انگیز اقدامات بین الاقوامی قانون کی صریح خلاف ورزی ہیں اور نہ صرف برادر ملک صومالیہ بلکہ پورے خطے کے امن و استحکام کے لیے خطرہ ہیں۔“

پاکستان نے عالمی برادری سے مطالبہ کیا ہے کہ وہ ”اس طرح کے کسی بھی اقدام کو مسترد کرے، اور اسرائیل کو وسیع خطے میں امن و استحکام کے لیے جاری کوششوں کو نقصان پہنچانے سے روکے اور جارحیت سے باز رکھے“۔

بیان میں مزید کہا گیا ہے کہ پاکستان کسی بھی صورت میں فلسطینیوں کو ان کی سرزمین سے جبری بے گھر کرنے کے لیے کسی بھی اقدام کو واضح طور پر مسترد کرنے کا اعادہ کرتا ہے اور فلسطینی عوام کے حق خود ارادیت کے لیے ان کی منصفانہ جدوجہد اور ایک خودمختار، آزاد فلسطینی ریاست کے لیے اپنی غیر متزلزل حمایت کا اعادہ کرتا ہے۔