بدلتے ہوئے سیکیورٹی چیلنجز کا مقابلہ کرنے کیلئے ہمہ جہت تیاری کی ضرورت ہے ، فیلڈ مارشل عاصم منیر

چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے پاکستان کے پیچیدہ اور بدلتے ہوئے سیکیورٹی چیلنجز کا مؤثر مقابلہ کرنے کے لیے جامع اور کثیر جہتی تیاری کی ضرورت پر زور دیاہے۔

آئی ایس پی آر کے مطابق فیلڈ مارشل عاصم منیر اسلام آباد میں نیشنل ڈیفنس یونیورسٹی (این ڈی یو) کے دورے کے موقع پر خطاب کر رہے تھے، جہاں جاری نیشنل سیکیورٹی اور وار کورس کے سول اور فوجی شرکاء کے پینلز نے انہیں قومی سلامتی کے چیلنجز اور ممکنہ ردعمل پر تعلیمی جائزے سے آگاہ کیا۔

اپنے خطاب میں فیلڈ مارشل عاصم منیر نے عالمی اور داخلی حفاظتی ماحول میں تبدیلیوں کی نشاندہی کرتے ہوئے کہا کہ پاکستان کو روایتی، غیر روایتی، انٹیلی جنس، سائبر، معلوماتی، عسکری اور اقتصادی شعبوں میں مسلسل چیلنجز کا سامنا ہے۔

انہوں نے کہا کہ ان چیلنجز سے نمٹنے کے لیے مسلسل مطابقت، قریبی تعاون اور قومی طاقت کے تمام عناصر کے درمیان ہم آہنگی ضروری ہے۔

فیلڈ مارشل نے مزید کہا کہ دشمن عناصر زیادہ تر بالواسطہ اور غیر واضح طریقوں پر انحصار کرتے ہیں، جس میں پراکسیز کا استعمال شامل ہے، تاکہ براہِ راست تصادم کے بجائے داخلی کمزوریوں کا فائدہ اٹھایا جا سکے۔ انہوں نے زور دیا کہ آئندہ قیادت کو ایسے خطرات کی شناخت، پیش بینی اور مؤثر طور پر ناکام بنانے کی تربیت دی جائے۔

انہوں نے غیر یقینی صورتحال میں واضح فیصلہ سازی کی اہمیت پر بھی زور دیا اور ذہنی لچک کو موجودہ متنازع اور منتشر حفاظتی ماحول میں کام کرنے کے لیے ایک اہم صفت قرار دیا۔

فیلڈ مارشل عاصم منیر نے این ڈی یو کے کردار کو سراہا اور اسے ایک ممتاز ادارہ قرار دیا جو اسٹریٹجک مفکرین تیار کرتا ہے، جو تعلیمی بصیرت اور پیشہ ورانہ تربیت کو مؤثر پالیسی سازی اور عملی نتائج میں منتقل کر سکیں۔

انہوں نے کہا کہ پیشہ ورانہ فوجی تعلیم ادارتی صلاحیت کو مضبوط کرنے، مقامی قابلیت کو فروغ دینے اور طویل مدتی قومی لچک کو یقینی بنانے میں مرکزی کردار ادا کرتی ہے۔

اپنے خطاب کے اختتام پر فیلڈ مارشل نے پینلز کے تجزیے کو سراہا اور شرکاء سے کہا کہ وہ چوکس، لچکدار اور دیانت، نظم و ضبط اور بے لوث خدمت کے اقدار کے لیے پرعزم رہیں۔

دورے کے آغاز پر آرمی چیف کا استقبال نیشنل ڈیفنس یونیورسٹی کے صدر نے کیا۔