نیا پے نے علی پے پلس کے ساتھ شراکت میں کیو آر ادائیگیاں متعارف کر دیں

پاکستان کے تیزی سے ابھرتے ہوئے فِن ٹیک پلیٹ فارم نیا پے نے عالمی والیٹ گیٹ وے علی پے پلس کے تعاون سے عالمی کیو آر ادائیگیوں کا آغاز کر دیا ۔اس شراکت داری کے تحت نیا پے کے صارفین اب دنیا کے 50 سے زائد ممالک میں علی پے پلس کے لاکھوں مرچنٹس پر اسکین اینڈ پے کے ذریعے فوری ادائیگیاں کر سکیں گے۔

یہ سہولت پاکستانی صارفین کو عالمی سطح کے ریٹیل، خوراک، ٹرانسپورٹ، صحت اور تفریح سمیت متعدد شعبوں تک رسائی فراہم کرتی ہے، جس سے بیرونِ ملک ادائیگیاں نہ صرف تیز اور محفوظ بلکہ پہلے سے کہیں زیادہ کم خرچ ہو گئی ہیں۔

علی پے پلس اس وقت دنیا بھر کے 40 بین الاقوامی موبائل پیمنٹ پارٹنرز کو 15 کروڑ سے زائد مرچنٹس سے جوڑتا ہے۔

نیا پے کا کہنا ہے کہ گلوبل کیو آر قبولیت کا اضافہ کمپنی کی اس کوشش کا حصہ ہے جس کے تحت پاکستانی صارفین اور کاروباروں کو عالمی معیار کی ادائیگیوں کا تجربہ فراہم کیا جا رہا ہے۔

اس سے پہلے نیا پے ویزا ڈیبٹ کارڈز، مقامی و بین الاقوامی رقوم کی منتقلی، بل ادائیگی، ہوم ری میٹنسز اور دیگر خدمات بھی مہیا کر رہا ہے۔

نیا پے کے سی ای او دانش اے لاکھانی کے مطابق کمپنی کا مقصد پاکستانیوں کو وہی مالی آزادی اور اعتماد فراہم کرنا ہے جو ترقی یافتہ مارکیٹوں میں دستیاب ہے۔ ان کے بقول نئی سہولت پاکستانی طلبہ، سیاحوں اور پیشہ ور افراد کے لیے عالمی سفر کو مزید پرسہولت بنائے گی۔

علی پے پلس کی نمائندہ پین یان نے کہا کہ موبائل پلیٹ فارمز کی تیز رفتار ترقی لوگوں کے سفر اور خریداری کے طریقوں کو تبدیل کر رہی ہے اور یہ شراکت پاکستانی صارفین کو دنیا بھر میں ایک مانوس اور قابلِ اعتماد ادائیگی کا تجربہ فراہم کرے گی۔