پاکستان اور بحرین اقتصادی روڈ میپ کے لیے گروپس قائم کریں گے

پاکستان اور بحرین نے مالیات، بینکاری، تجارت اور معیشت کے شعبوں میں مستقبل کے تعاون کے لیے متعلقہ حکام پر مشتمل ٹیمیں قائم کرنے کا فیصلہ کیا ہے ،تاکہ ایک جامع روڈ میپ تیار کیا جا سکے۔

یہ فیصلہ پاکستان کے نائب وزیر اعظم و وزیر خارجہ اسحاق ڈار اور بحرین کے وزیر خزانہ و قومی معیشت شیخ سلمان بن خلیفہ آل خلیفہ کے درمیان ملاقات کے دوران کیا گیا۔

دفتر خارجہ کے بیان کے مطابق دونوں فریقین نے مالیاتی شعبے میں تعاون کو بڑھانے پر مفید بات چیت کی۔

بیان میں کہا گیا کہ بحرین نے فِن ٹیک کے شعبے میں نمایاں پیش رفت کی ہے اور اس نے پاکستانی بینکنگ سیکٹر کے ساتھ اپنی مہارت شیئر کرنے کی پیشکش کی ہے۔

دونوں وزرا نے دونوں برادر ممالک کے مرکزی بینکوں کے درمیان تعاون کے مواقع پر بھی بات کی۔

اسی دوران وزیر داخلہ محسن نقوی نے اپنے بحرینی ہم منصب، جنرل شیخ راشد بن عبد اللہ آل خلیفہ سے ملاقات کی۔

وزیر داخلہ نے سوشل میڈیا پر کہا ہم نے علاقائی سیکیورٹی، انسداد منشیات، قانون نافذ کرنے والے اداروں کی استعداد بڑھانے اور معلومات کے تبادلے پر بہترین گفتگو کی۔

انہوں نے بحرین کی گرم جوشی سے میزبانی اور دونوں ممالک کے لیے محفوظ اور مضبوط مستقبل کے لیے شراکت داری کو مزید مضبوط کرنے کے عزم کا شکریہ ادا کیا۔

بدھ کو وزیر اعظم شہباز شریف نے بحرین کے بادشاہ حمد بن عیسیٰ آل خلیفہ سے ملاقات کی، جس میں دونوں ممالک کے مضبوط اور تاریخی تعلقات کو دوبارہ اجاگر کیا گیا۔

دونوں فریقین نے دوطرفہ تعلقات کا جائزہ لیا اور سیاسی، اقتصادی، دفاعی اور ثقافتی شعبوں میں تعاون بڑھانے پر اتفاق کیا۔

وزیر اعظم نے بحرین کی حمایت کی ستائش کی، بشمول اسلام آباد میں کنگ حمد یونیورسٹی برائے نرسنگ اور متعلقہ طبی سائنسز کے قیام کا ذکر کیا ، جس کا ستمبر 2025 میں افتتاح ہوا اور پاکستان میں حالیہ دہشت گردانہ واقعات کے بعد بحرین کے ساتھ یکجہتی کا اظہار بھی کیا۔

اس سے قبل وزیر اعظم نے بحرینی سرمایہ کاروں کو فوڈ سیکیورٹی، آئی ٹی، تعمیرات، معدنیات، صحت کی دیکھ بھال، قابل تجدید توانائی اور سیاحت میں مواقع تلاش کرنے کی دعوت دی۔ انہوں نے کراچی/گوادر اور خلیفہ بن سلمان پورٹ کے درمیان بندرگاہوں کی بہتر رابطہ کاری کی بھی تجویز پیش کی۔