وزیراعظم شہباز شریف کی ایرانی این ایس سی سیکرٹری سے ملاقات، دوطرفہ تعلقات کو مزید مضبوط بنانے کا عزم
- وزیراعظم نے دونوں ممالک کے درمیان تاریخی اور برادرانہ تعلقات کو اجاگر کیا اور مختلف شعبوں میں تعاون کو مزید گہرا کرنے پر زور دیا
وزیرِاعظم آفس کے بیان میں کہا گیا ہے کہ وزیرِاعظم شہباز شریف نے منگل کے روز ایرانی سپریم نیشنل سیکیورٹی کونسل کے سیکرٹری علی اردشیر لاریجانی سے ایوان وزیرِاعظم میں ملاقات کی ہے۔
بیان کے مطابق ملاقات کے دوران وزیرِاعظم نے پاکستان اور ایران کے تاریخی اور برادرانہ تعلقات پر روشنی ڈالی اور مختلف شعبوں میں تعاون کو مزید مضبوط بنانے پر زور دیا۔
لاریجانی، جو پاکستان کے سرکاری دورے پر ہیں، نے بھی اس جذبے کا اظہار کیا اور باہمی تعلقات کو وسیع اور باہمی مفاد کے شعبوں میں بڑھانے کی ضرورت پر زور دیا۔
دونوں فریقین نے اہم علاقائی اور بین الاقوامی امور پر بھی تبادلۂ خیال کیا اور خطے میں امن و استحکام کے فروغ کے لیے مربوط کوششوں پر زور دیا۔
وزیرِاعظم نے ایران کے علاقائی مسائل پر اصولی موقف اور مشکل حالات میں پاکستان کے ساتھ یکجہتی کو سراہا، جبکہ پاکستان کی تہران کے ساتھ قریبی تعاون ، امن اور خوشحال مستقبل کے لیے اپنے عزم کا اعادہ کیا۔
ڈاکٹر لاریجانی نے ایران کے حالیہ 12 روزہ (اسرائیل کے ساتھ) تنازع کے دوران پاکستان کی حمایت پر شکریہ ادا کیا اور تنازعات کے حل کے لیے بات چیت اور سفارت کاری کو فروغ دینے میں اسلام آباد کے کردار کو سراہا۔
وزیرِاعظم نے ایران کے سپریم لیڈر سید علی خامنہ ای اور صدر مسعود پیژیشکیان کو نیک تمناؤں کا پیغام پہنچایا اور پاکستان کے ساتھ مضبوط دوطرفہ تعلقات کے لیے ان کی حمایت کا شکریہ ادا کیا۔
اس بات پر اتفاق کیا گیا کہ نائب وزیرِاعظم اور وزیرِخارجہ سینیٹر اسحاق ڈار کی قیادت میں ایک وفد جلد ایران کا دورہ کرے گا تاکہ باہمی تعاون کو، خاص طور پر زرعی شعبے اور رابطوں کے میدان میں مزید فروغ دیا جا سکے۔
Comments
Comments are closed.