بنگلادیش کو سپلائی کے لیے ایک لاکھ ٹن چاول کا ٹینڈر جاری

پاکستان کی سرکاری ایجنسی ٹریڈنگ کارپوریشن آف پاکستان (ٹی سی پی) نے بنگلادیش کو سپلائی کے لیے ایک لاکھ میٹرک ٹن چاول خریدنے کا ٹینڈر جاری کر دیا۔

قیمت کی پیشکشیں جمع کرانے کی آخری تاریخ 28 نومبر ہے۔ بنگلادیش نے بھی پیر کو ایک اور چاول کا ٹینڈر جاری کیا ہے، جو مقامی قیمتوں کو کم کرنے کے لیے گزشتہ چند ہفتوں میں کیے گئے درآمدی ٹینڈرز کے سلسلے کی ایک کڑی ہے۔

ٹینڈر میں لمبے دانے والے سفید چاول کی طلبی کی گئی ہےجبکہ قیمت کی پیشکشیں جمع کرانے کے بعد 21 ورکنگ دن تک قابلِ قبول ہونی چاہئیں۔چاول کی ترسیل کنٹریکٹ ملنے کے 45 کیلنڈر دن کے اندر دستیاب ہونی ضروری ہے۔

تاجروں کا خیال ہے کہ یہ ٹینڈر شاید پاکستانی چاول کو بنگلادیش کی درآمدی سپلائی میں شامل کرنے کی کوشش ہے جبکہ مارکیٹ میں توقع ہے کہ بنگلادیش کی حالیہ خریداریوں میں کچھ مقدار بھارتی چاول سے بھی پوری کی جائے گی۔