ٹی 20 ٹرائی سیریز : پاکستان نے زمبابوے کو شکست دے کر فائنل میں جگہ پکی کرلی

سہ فریقی ٹی 20 سیریز کے چوتھے میچ میں پاکستان نے زمبابوے کو 69 رنز سے شکست دے دی۔

تفصیلات کے مطابق راولپنڈی میں سہ فریقی سیریز کا چوتھا میچ پاکستان اور زمبابوے کے درمیان کھیلا گیا۔ پاکستان کے کپتان سلمان آغا نے ٹاس جیت کر پہلے بیٹنگ کا اعلان کیا۔

پہلے بیٹنگ کرتے ہوئے شاہینز نے20 اوورز میں پانچ وکٹوں کے نقصان پر 195 رنز بنائے، بابر اعظم 74 اور صاحبزادہ فرحان 63 رنز بناکر نمایاں بلے باز رہے۔

صاحبزادہ فرحان اور بابر اعظم نے شاندار بیٹنگ کی، صاحبزادہ فرحان نے 41 گیندوں پر 3 چھکوں اور چار چوکوں کی مدد سے 63 رنز کی شاندار اننگز کھیلی اور 132 کے مجموعی اسکور پر آؤٹ ہوئے۔

بابر اعظم74 رنز بناکر 163 کے مجموعی اسکور پر پویلین لوٹے۔

196 رنز ہدف کے تعاقب میں زمبابوے کی ٹیم 19 اوورز میں 126 رنز پر ڈھیر ہوگئی، زمبابوے کی جانب سے رائن برل 67 رنز کے ساتھ نمایاں بلے باز رہے جبکہ کپتان سکندر رضا نے 23 رنز کی اننگز کھیلی۔

پاکستان کےعثمان طارق نے زمبابوے کے خلاف شاندار بولنگ کرتے ہوئے ہیٹ ٹرک کرلی۔

عثمان طارق نے شاندار بولنگ کی اور 4 اوور میں 18 رنز دے کر چار کھلاڑیوں کو شکار بنایا۔

محمد نواز نے دو، فہیم اشرف، نسیم شاہ اور محمد وسیم نے ایک ایک وکٹ حاصل کی۔

زمبابوے اور سری لنکا کے درمیان 25 نومبرکو اہم میچ ہوگا جس میں فتح حاصل کرنے والی ٹیم فائنل میں پاکستان کے مدمقابل آئے گی۔

پاکستان کی ٹیم میں صائم ایوب، صاحبزادہ فرحان، بابر اعظم، سلمان علی آغا، عثمان خان، فخر زمان، محمد نواز، فہیم اشرف، محمد وسیم، نسیم شاہ، عثمان طارق شامل ہیں۔

زمبابوے کی ٹیم میں برائن بینیٹ، ریان برل، سکندر رضا (کپتان)، بریڈلی ایونز، برینڈن ٹیلر (وکٹ کیپر)، تدیواناشے مارومانی، تشنگا موسی کیوا، ٹونی منیوگا، ویلنگٹن ماساکادزا، تینوٹینڈا میپوسا، رچرڈ نگاراوا شامل ہیں۔