فیصل آباد، گلو بنانے والی فیکٹری میں دھماکہ، 21 افراد جاں بحق، متعدد زخمی

فیصل آباد کے علاقے ملک پور میں گیس رساؤ کے باعث گلو فیکٹری میں زوردار دھماکے کے نتیجے میں 21 افراد جاں بحق، متعدد زخمی اور کئی عمارتیں اور گھر تباہ ہو گئے ۔

متاثرین کی تعداد میں مزید اضافہ متوقع ہے۔

وزیرِ اعلیٰ پنجاب مریم نواز نے کمشنر فیصل آباد سے اس سانحے کی رپورٹ طلب کی ہے۔ مریم نواز نے اس المناک حادثے پر گہرے افسوس کا اظہار کیا اور ہلاک شدگان کے اہل خانہ سے تعزیت کی۔ انہوں نے زخمیوں کے فوری علاج کے لیے انتظامیہ کو ہدایات بھی جاری کیں۔

21 نومبر 2025 کی صبح ملک پور علاقے میں واقع ایک گلو بنانے والی فیکٹری میں گیس رساؤ کے سبب دھماکہ ہوا۔ دھماکے کے نتیجے میں فیکٹری میں موجود کیمیکلز میں آگ بھڑک اٹھی جو تیزی سے آس پاس کی دیگر فیکٹریوں اور ورکشاپس تک پھیل گئی۔ دھماکہ اتنا شدید تھا کہ ارد گرد کئی عمارتیں اور مکانات شدید نقصان کا شکار ہو گئے۔

ریسکیو کی اربن سرچ اینڈ ریسکیو ٹیموں نے جدید مشینری اور آلات کی مدد سے فوری کارروائی کرتے ہوئے ملبے تلے دبے افراد کو نکالا، جن میں سے 17 افراد موقع پر جاں بحق اور متعدد زخمی ہوئے۔

زخمیوں کو فوری طور پر اسپتال منتقل کردیا گیا۔ تلاش و ریسکیو کا کام جاری ہے اور ریسکیو کی 20 سے زائد ایمبولینسز اور فائر گاڑیاں امدادی کارروائیوں میں مصروف ہیں۔ آگ پر قابو پا لیا گیا ہے اور ملبے تلے دبے افراد کو نکال لیا گیا ہے، تاہم مزید تلاش جاری ہے۔

کاپی رائٹ بزنس ریکارڈر 2025