آئی سی سی نے بابراعظم پر ضابطہ اخلاق کی خلاف ورزی پر جرمانہ عائد کردیا

انٹرنیشنل کرکٹ کونسل نے سری لنکا کے خلاف تیسرے میچ میں ضابطۂ اخلاق کی خلاف ورزی پر قومی اسٹار بیٹر بابر اعظم پر میچ فیس کا 10 فیصد جرمانہ عائد کرتے ہوئے اُن کے ڈسپلنری ریکارڈ میں ایک ڈی میرٹ پوائنٹ بھی شامل کر دیا ہے۔

آئی سی سی کے مطابق 31 سالہ بابراعظم نے آئی سی سی کوڈ آف کنڈکٹ کے آرٹیکل 2.2 کی خلاف ورزی کی جو دورانِ میچ کھیل یا گراونڈ کے سامان کو نقصان پہنچانے یا ان کا غلط استعمال کرنے سے متعلق ہے۔

اس کے علاوہ بابراعظم کے ڈسپلنری ریکارڈ میں ایک ڈی میرٹ پوائنٹ بھی شامل کردیا گیا ہے۔

سری لنکا کیخلاف راولپنڈی میں کھیلے گئے تیسرے ون ڈے میچ کے دوران بابر اعظم 21ویں اوور میں آؤٹ ہونے کے بعد اپنا بیٹ اسٹمپس سے ٹکرا بیٹھے تھے جس پر میچ آفیشلز نے نوٹس لیا۔

آن فیلڈ امپائرز ایلکس وارف اور راشد ریاض، تھرڈ امپائر شرف الدولہ ابن شہید اور فورتھ امپائر فیصل آفریدی نے یہ الزام عائد کیا جب کہ علی نقوی جو ایمریٹس آئی سی سی انٹرنیشنل پینل آف میچ ریفریز کے رکن ہیں نے سزا تجویز کی۔

بابر اعظم نے اپنی غلطی تسلیم کرلی اور میچ ریفری کی تجویز کردہ سزا قبول کرلی ہے جس کے نتیجے میں باضابطہ سماعت کی ضرورت نہیں پڑی۔